Багъасы кётюрюллюкдю

Быйыл 9 декабрьде Россейде борчлу халда автострахование этиу системада тюрлениуле боллукъдула. Энди кёп водительге ОСАГО багъаракъ туруп башларыкъды, талай регионда уа ол эки кереге окъуна ёсерикди.

Тарифле эм багъала

Россейни Банкы «тариф коридорну» кенгертгенди. Страховой компанияла ма анга къарап тохташдырадыла ОСАГО-ну багъасын. Водительлени асламысына ол эки жанына да 15 процентге, мотоциклде жюрюгенлеге уа – 40 процентге окъуна кенгертилликди. Башхача айтханда, автостраховщикле багъаланы тохташдырыуда кёбюрек эркинлик аладыла: бирлеге бютюнда иги онг берирге, башхаланы уа полислерин андан да багъа этерге боллукъдула.

Экинчисин а руль артына алай кёп болмай олтургъанла, сора авариялагъа терк-терк тюше туруучула сезерикдиле. Ала эски тарифлени болжалы чыкъгъынчы дери полис алыргъа ашыкъсала да боллукъду.

Бир-бир регионлагъа - энчи эс

Новосибирск областьдан эмда Ингушетия Республикадан водительлени артыкъ хычыуун тюрлениуле сакъламайдыла. Алада энчи коэффициент кийириледи, анга кёре ОСАГО полис да эки кереге багъа болады. Бу оноуну магъанасы баямды: ол регионлада страхованияда хыйлачылыкъ этиу кенг жайылгъаны ючюн компанияла артыкъ къоранчла этедиле.

Саулай айтханда уа,  коэффициентле 24 регионда тюрленирикдиле. Ол санда бешисинде кётюрюллюкдюле, къалгъан онтогъузусунда уа азайырыкъдыла. Алай эсе уа,  алада жашагъанла, ким биледи, полис ючюн азыракъ тёлерге да болурла.

Хайыры уа бармыды?

Тюрлениуле къуру жангы полислеге угъай, эскилеге да жетерикдиле. Улоуну иеси къагъытха энтта да биреуленни жазаргъа сюйсе, 9 декабрьден сора ол жумуш багъаракъ боллукъду. Аны ючюн аны ишин алгъаракъ этерге ашыгъыгъыз.

Дагъыда страховой келишимни болжалындан алгъа тыйгъанда, компанияла бир процентге азыракъ ахча аллыкъдыла; ары дери 23-ню орунуна 22%.

Саулай айтханда, водительлени кёбюсюн, бегирек да мотоциклистлени, артыкъ хычыуун тюрлениуле сакъламайдыла. Алай а ким биледи, бир-бир страховой компаниялада, араларанда конкуренция чыгъып, багъала артыкъ ёсмез эселе да. Дагъыда низамлы водительле азыракъ тёлеп къутулургъа боллукъдула.