Лашкута

Лашкута́  Къабарты-Малкъарны Элбрус районуну  шимал-кюнчыгъыш кесегинде, Басхан сууну онг жагъасында, Жанхотия эл бла тенгшиде орналыпды. Аны район центрден Тырныауздан 33 километр, республиканы ара шахары Нальчикден кюнбатышда 62 километри  узакълыкъдады.

Элни асламын  отлау эм эл мюлк жерле къурайдыла.

Лашкута эл къыбыла жанында Бедик, кюнбатыш жанында - Жанхотия, шимал жанында-Заюково элле бла, кюнчыгъышда къырал Агъач фондну (Гослесфонд) жерлери бла чекдеди.

Мал кютер жерлерини асламысы республиканы тау этекледе Басхан тарлада орналгъанды. Элни жеринде орта бийиклиги  тенгиз жагъадан 870 метр чакълыды. Эм бийик жерлеринден бири «Буруу къол баш» тауду. Ол тенгиз жагъасындан 1753 метр бийикликдеди.

Мында жай-жылы, ингирлери - салкъыл, къыш, кесича, сууукъ-салкъын, зауукълуду. Жауунну асламысы апрельден  июльгъа дери жауады. Жаз башында хауа терк тюрленнген заманда, тауладан тарлагъа къургъакъ, исси жел урады.

Бу эл 1926  жылда башха жерледен кёчюп келгенледен къуралгъанды. Уллу Ата Журт уруш къазауат жыллада бу жерни немис  аскерлери 1942-чи жылны октябрь айында алгъандыла, Эл 1943  жылда башына азат этилгенди. Алай бир жылдан, 1944-чю жылны мартында, малкъар халкъ Орта Азиягъа кёчюрюлгенди, эм бу жерни атына Заречный деп  аталгъанды.

1957  жылда СССР-ни Баш Советини оноуу бла  малкъарлылагъа жашагъан жерлерине къайтыргъа онг табылгъанды. Лашкутачыла да, амалларына кёре, туугъан журтларына къайтыргъа кюрешгендиле.

1958  жылда РСФСР-ни Баш Советини Президиумуну указы бла ат кетерилгенди, эм ол Къабарты-Малкъар АССР-ни Басхан районуну Жанхотия эл советини къурамына киреди.

1995  жылда Лашкута эл, жангыдан къуралгъан Элбрус районуну къурамына берилгенди, кеси аллына эл администрациясы, школу, почтасы ишлеп башлайдыла.

Элни орта билим берген школу, сабий сады, почтасы, маданият юйю, саусузлагъа биринчи кереклерин тамамларча медпункту, межгити барды.

Элде жети орам бардыла: Борчаланы, Малкъарланы, Темуккуланы, Школьная, Мира, Надречная, Подгорная.

Бир сёз бла айтханда, гитче тау элчик Лашкута къая тюбюнде кесича жашауун бардырады, тамблагъы жашаугъа таукел, базыныулу къарайды.