Гитче бизнесни онгдуруу

Шимал Кавказда гитче эмда орта предприятияла къыралны болушлугъу бла 25 процентге кёп ахча къоллу болгъандыла. Быйыл биринчи тогъуз айны ичинде Миллет гарантия системаны амалларын хайырланып, бизнес 31,1 миллиард сом алгъанды, дегендиле МСП Корпорацияда.

Бу жаны бла алчыла Ингушетия бла Дагъыстан республикаладыла: ала кёрюмдюлерин, озгъан жыл бла тенглешдиргенде, эки кереден асламысына кёбейтгендиле (2,85 эм 5,23 миллиард сом). Ызы бла Къарачай-Черкес Республика бла Къабарты-Малкъар барадыла: биринчисинде – 3 (48%), бизде уа – 2,79 (25%) миллиард сом бла. Бешинчи жерде уа Ставрополь крайды, 13 процент ёсюмю бла (12,1 миллиард сом).

Бёлюмлени юсюнден айтханда, эм уллу ёсюмню илму-техника кёргюзтгенди – жети кереге! Алчыланы санына билим бериу (3,8 кереге) бла инфраструктура къурулуш (3,1), административ жумушла (2,4), культура эм спорт (1,8 хар бири да) бёлюмле да киргендиле.

«Къырал себеплик этиуде Шимал Кавказ магъаналы округладан бириди. Быйыл биринчи юч кварталны ичинде сагъынылгъан гарантия системаны чеклеринде гитче бизнес бла кюрешгенле былтырдан эсе 44 процентге кёп ахча къоллу болгъандыла. Энтта да жыйырма процентни уа орта эмда эм гитче бизнес жалчытхандыла», - дегенди МСП Корпорацияны башчысы Александр Исаевич.