Шахарны таза суу бла жалчытырыкъдыла

Прохладныйде баш водоводну жангыртыу ишле къыстау бардырыладыла, деп билдиргенди КъМР-ни Башчысы Казбек Коков кесини телеграм-каналында.

Шахарны баш водоводуна тынгылы ремонт этилип бошала, сууну тазалыгъы бютюн иги боллукъду эм аны бла Прохладныйде жашагъанла суу бла тутхучлу жалчытынырыкъдыла. Суу келген быргъыла битеу да 4 километр жолда алышынырыкъдыла.

Бюгюнлюкде специалистле алгъадан хазырлагъан жерлеге жангы быргъыла салына турадыла. Ишни бардыргъанда шёндюгюлю технологияланы хайырланадыла эм кёп жылланы жюрютюрча быргъылаы орнатадыла.

Бу магъаналы проект Прохладныйде жашагъан хар инсанны жашаууну качествосун игилендирирге себеплик этерикди эм аны бла бирге шахар инфраструктура да тийишлисича айныйды. Битеу белгиленнген ишле "Инфрастуктураны - жашау ючюн" деген миллет проектни чеклеринде бардырыладыла эм ала келир жылда бошаллыкъдыла, деп айтылады билдириуде.