«География диктантны» жазгъандыла.

Республиканы Курортла эм туризм министерствосунда география диктантны жазгъандыла. Анга Орус география обществону «Альтаир» жаш тёлю клубуну келечилери да къатышхандыла. 

 Сыйлы къонакълача, ары курортла эм туризм министрни орунбасары Асланби Шхагапсоев бла обществону регионда советини келечиси биология илмуланы доктору профессор Мухамед Кожоков чакъырылгъандыла. Жыйылгъанланы алгъышлай, Асланби Шхагапсоев министерствода географияны бла туризмни сюйген, саулукълу жашау бардырыргъа итиннген жаш адамланы къонакъгъа алыргъа къачан да хазыр болгъанларын белгилегенди. «Багъалы шуёхларыбыз! Бюгюн сизни бла бирге бу аламат акциягъа къатышханыма къууанама. «Альтаир» клубну, аны жетишимлерини, сейир башламчылыкъларыны юсюнден, айхай да, эшитгенлей турама. Министерствону эшиклери сизге къачан да ачыкъдыла. Насийхатчыларыгъыз юйретген затла артда жашауугъузда да жарарына, туризмни айнытыугъа сизни тёлюгюз тийишли юлюшюн къошарына ийнанама», - дегенди ол.

Диктантны аллында алгъышалу сёзюн «Альтаирни» башчысы Алина Бочарова да айтханды. Ол эсгертгенича, диктантны жазыу миллион адамгъа ахшы тёреге айланнганды. «Географияны сюйгенлеге ол, керти да, байрамды. Биринчи «География диктант» 2015 жылда жазылгъанды, анга сорууланы уа жангыз алимле бла экспертле угъай, битеу дуниядан да бу илмуну сюйгенле эмда «География диктантха кесинги сорууунгу жаз» деген жыл сайын бардырылгъан эришиуге къатышханла да хазырлагъан эдиле», - деп къошханды Богачева.  

Диктантны жазаргъа 45 минут берилгенди, соруула уа, къыйынлыкъларына кёре, эки къауумгъа юлешиннгендиле. Аланы биринчи онусу жамауатха туура болгъан затланы юслериндендиле, отузу уа – къыйыныракъдыла, алагъа тюз жууапны билмесенг да, сагъыш эте, жууап берирге боллукъду. Диктантны эсеплери аны сайтында 21 декабрьде басмаланырыкъдыла, аны жазгъанла уа сертификатла бла саугъаланырыкъдыла.

Динтантдан сора «Туризмни бла краеведенияны школуну» эсеплери чыгъарылгъандыла.