Багъыуну заманында башларгъа керекди

Битеу дунияда да 1 декабрьде СПИД-ге къажаулукъну кюню бардырылады.  Анга атап,  Россейни Саулукъ сакълау министерствосу ыйыкъны ичинде бу къыйын аурууну профилактикасына аталгъан ангылатыу жумушла бардырады.

Аны чеклеринде КъМР-ни Саулукъ сакълау министерствосуну штатдан тышында баш наркологу, КъМР-ни Психиатрияны бла наркологияны клиника арасыны баш врачыны орунбасары, врач психиатр-нарколог Резуан Бетуганов  психоактивный затланы ичгенде ВИЧ-инфекция жугъарыгъына къоркъууну юсюнден айтады:

- Бу къыйын  ауруу бир шприц бла хайырланнганда жугъаргъа боллугъу кенг белгилиди. Алай бюгюнлюкде жангы психоактивный затла да къоркъуулудула.  Аланы ичгенни акъылы, психикасы тюрленеди, ол этгенин, осал къылыкъларын ангыламайды.  Бир шприц, бир раствор, бир фильтр - алай бла вирус къаннга тюшерге боллукъду. Быллай болум а ВИЧ, гепатит жугъаргъа къоркъуу уллуду,-дейди нарколог.

 ВИЧ-инфекция адамны нерваларын къозгъайды, аны хали тюрленеди. Битеу бу затланы хатасындан ол ууну бютюнда кёп ичерге излейди.

-  Бу осал болумладан къалай къутулгъун? Биринчиден, кесинге кертини айтып, ауругъанынгы ангыларгъа керекди.   Сиз неда жууукъ адамыгъыз укол этип, ууну иче эсегиз, - ауруу жугъарыгъын билирге керексиз. Аны ахыры аман бла бошаллыгъын сезмесегиз, тохтагъан да къыйын боллукъду,-дейди Резуан Робертович.

Ол себепден заманында медицина болушлукъ алыргъа керекди. Аракъыны, наркотикни къояргъа боллукъду, ол аурууду эм аны багъыуну амаллары бардыла, дейди  ушакъ нёгерибиз. «Бизни арада саусузлагъа профессионал болушлукъ берилликди. Ол санда дарманла бериледиле, психологла да болушадыла, медицина реабилитация да барды»,-дейди ол.

 ВИЧ-инфекция жукъгъанын бла къалгъанын билир ючюн а, узакъ болжалгъа салмай, къанны тинтирге керекди. ВИЧ аурууду, аны   багъаргъа юйреннгендиле. Жаланда терапияны заманында башларгъа керекди.