Къонакъ юйлени халларына къарагъандыла

Туризмде регион къырал контрольну бардырыуну чегинде республиканы курортла эм туризм министерствосуну инспекторлары Элбрус районда къонакъ юйлени халларына къарагъандыла. 

Быллай тинтиулени борчу къонакъ юйлеге салыннган мардала бла жорукъла къалай толтурулгъанларын сюзюудю, аланы юслеринден билдириуле Турист индустрияны объектлерини тизмесине кийирилгенлерин бла къалгъанларын тохташдырыуду.

Тинтиулени кезиуюнде инспекторла ондан аслам къонакъ юйде болгъандыла, аладан бешисинде башда сагъынылгъан тизмеге кийириу жаны бла бузукълукъланы ачыкълагъандыла эм аланы тюзетирге эсгертиуле этилгендиле. Андан тышында, бу тинтиуледе биринчи кере «Инспектор» деген приложение хайырланылгъанды, аны болушлугъу бла бузукълукъла терк табыладыла, алай бла контроль ишлени качествосу да ёседи.