Аскер махтаулукъну тарыхында эм сыйлы кюнледен бири

Белгисиз солдатны кюню  къыралыбызда аскер махтаулукъну тарыхында бек магъаналы эмда сыйлы кюнледен бирине  саналады. Аны бла байламлы КъМР-ни Башчысы Казбек Коков кесини телеграм-каналында былай жазгъанды:

«Ол кюн Россей Федерацияны Президентини Указы бла  2014 жылда Ата журтну душмандан къоруулар ючюн къанларын-жанларын аямай къазауат этип ёлген, алай атлары белгисизлей къалгъан жигитлеге баш урууну белгисича тохташдырылгъанды. 

3 декабрь да бошдан сайланмагъанды:  1941 жылны декабрь айыны ал кюнлеринде совет аскер гитлерчилени Москвагъа ёшюн уруп барыуларын тохтатханды. Душманны ара шахарыбызны къолгъа этер умуту ма ол кюн юзюлгенди.  

Къызыл аскерчиле, Ата журт ючюн сермеше, бир заманда да болмагъанча уллу жигитлик этгендиле, кишиликлерин, ётгюрлюклерин да кёргюзтгендиле. Душман бла жанларын-къанларын аямай сермешгендиле, анга туугъан жерлерини бир атламын да бермез ючюн къанлы къазауат этгендиле. Ма аны себепли бу кюнню бизге энчи магъанасы барды.

Москвада Александровский терек бахчада уллу эсгертмеге миллионла бла адамла келгенлей турадыла, атлары белгисиз къалгъан аскерчилени эсгерир эмда алагъа баш урур ючюн.

Ала унутулмагъандыла, белгисизлени атларын белгили этиу жаны бла иш тохтамай барады. Аны излеучю отрядла РФ-ни Къоруулау министерствосуну себеплиги бла арымай-талмай бардырадыла.

Москвада Кремльни къабыргъасыны къатында Белгисиз солдатны къабырындагъы мермер къангада жазылгъан бу сёзле хар бирибизни да жюрегибизни къозгъамай къоймайдыла: «Атынг белгисизди, жигитлигинг ёлюмсюздю»