Заповедник бла школчула: бирге – игиди

Школчуланы арасында экология жаны бла окъуулулукъ иги болуруна Къабарты-Малкъарны заповедниги да уллу къыйын салады. Бу учреждение «Экологну кюню», «Къышда кечиннген чыпчыкълагъа болуш», «Агъач къарауулну кюню» деген жумушланы кезиу-кезиу бардырады. «Жыл сайын алагъа саулай республикадан школчула мингле бла къатышадыла», - дегенди заповедникни башчысыны экинчиси Тогъузаланы Лейла.

Заповедник Нальчикде сегизинчи номерли мектеп бла байламлыкъ жюрютгенли иги кесек заман болады. Анда Кучукланы Марина географиядан он жылдан артыкъ окъутады. Ол къуру устаз болуп къалмай, анда 8 «а» классха да таматалыкъ этеди.

- Бу класс бла бирге биз жаланда окъуу бла чекленип къалмай, кёп жаны бла ёсебиз, айныйбыз, жангы сезимле къурайбыз. Географиягъа къуру илму деп къояргъа жарамайды, ол  дуниягъа терезеди. Мен аны бек сюеме, кесин да сейирликге санайма. Бу предмет адамгъа ол бир кере да болмагъан неда арталлыда болмазлыкъ жерлени юсюнден ангылау береди, - дегенди Марина Борисовна.

Сагъынылгъан мектепде учреждение «Заповедная школа» деген экология кружокну ишин алты жыл бардырады. Анда сабийлеге табийгъатха аяулу кёзден къарауну магъанасы уллу болгъанын ангылатадыла.

Тогъузаланы Лейла айтханнга кёре, быллай байламлыкъла ёсе келген тёлюде экология жаны бла къыйматлы къарам къурайдыла. Сабийле табийгъатны байлыкълары бла шагъырейленедиле, бир-бир битимле бла жаныуарла тас болуп кетерге боллукъларына тюшюнедиле, аланы сакъларгъа кереклисин да ангылайдыла.

Ол орта школда да аллай затлагъа уллу эс буруп, окъуучулагъа жаланда карталаны неда хауа болумланы юслеринден айтып къоймай, тёгерегибизде болгъан затлагъа жууаплы болургъа юйретедиле.