Череклеге асыл балыкъла жибергендиле

Чабакъчыкъла жибериллик жерлени Росрыболовствону Шимал Кавказда бёлюмю бла бирге илму тинтиуле бардыргъандан сора белгилейдиле. Аланы кеслерин да энчи халда ала чабакъланы фермасында ёсдюредиле. Бир жыллары толуп,  ауурлукълары да 13-20 граммгъа жетгенден сора тийишли оборудованиясы болгъан   улоу  бла транспортировка этиледи. Аны кезиуюнде чабакъла апчымазча  температурасы эм хауасы да мардалагъа келишген суудан толу чыккырда турадыла.

Череклеге чабакъчыкъла жибериу жаны бла иш  2014 жылдан бери бардырыла. Аны кезиуюнде гидроэнергетикле Къабарты-Малкъарны  череклерине беш миллиондан артыкъ асыл балыкъ  бла ала чабакъ жибергендиле.

Эсге сала айтсакъ, бу акцияны РусГидро биринчи кере 2003 жылда Узакъ Востокда бардыргъанды. Ол заманда Амур тийреледе Бурей ГЭС-ни огъары жанында кёлге 36 минг чабакъчыкъ жиберилгенди. Ызы бла бу огъурлу ишге биригиуню  Къабарты-Малкъарда, Дагъыстанда, Къарачай-Черкесде, Шимал Осетияда бёлюмлери, Новосибирск, Саратов, Жигулёвск, Воткинск, Чебоксары, Къобан ГЭС-ле эм Чувашияда ток сатыу бла кюрешген предприятие да къошулгъандыла.  Андан бери бу регионлада суулагъа стерлядь, ылышык, бекре, калуга, акъ амур, карп, шишмен, сапран, акъ чабакъ, асыл балыкъ эм башха чабакъладан иги кесеги  жиберилгенди. Аланы бир къаууму  багъалылагъа эм  Къызыл китапха тюшгенледиле.

 - Экология жаны бла жууаплылыкъ бизни баш борчларыбыздан бириди. Аны бла байламлы республиканы тамаша табийгъатын сакълауда бир кесек окъуна  къошумчулукъ эталгъаныбызгъа ёхтемленебиз. Къызыл китапха кирген чабакъланы сакъларча эм айнытырча мадар этилгени, бизни тюзюнлей борчубуздан сора да,  тамблагъы кюннге инвестицияды, ёсе келген тёлюлеге къаллыкъ байлыкъды,- дейди  РусГидро компанияны Къабарты-Малкъарда бёлюмюню таматасы  Игорь  Кладько.