Бирликни, шуёхлукъну да кючлей

Кёп болмай «СтудПутёвка»  федерал проектни чеклеринде Донецк, Луганск республикаланы эм Запорожье бла  Херсон областьланы студентлери Къабарты-Малкъар къырал университетни билим бериу, илму эм маданият программалары бла  шагъырейленирге келгендиле. Бу жол ала  вузну  Элбрусда билим бериу-илму комплексинде тохтагъандыла.  

Сагъынылгъан проект  жангы регионладан студентлеге къыралны башха субъектлеринде болургъа, студент  биригиуню кючлерге, бир бирни иги таныргъа, жашаугъа къарамларын, оюмларын билирге эм  маданият энчиликлери бла шагъырейленирге да онг тапдырады.  

- Уллу къыралыбызны регионларында  тенглерибиз бла танышыргъа, бийик билим берген учреждениялада болургъа онг чыкъгъанына  бек ыразыбыз. Бу жол КъМКъУ-ну юсюнден кёп жангы зат билгенбиз, окъуу  программалары бла шагъырейленнгенбиз, тенглерибиз бла танышханбыз эм бирге проектле къураргъа да  жетишгенбиз,- дейди Донецк Республикадан  келген студент. 

Бизге  КъМКъУ-да жарыкъ бетден тюбегенлерине бек бюсюрегенме. Мында студентлени араларында  бирлик  эм шуёхлукъ  да болгъанлары кёзге урунады. Ол а  окъууда эм чыгъармачылыкъда да жетишимлеге таукеллендиреди.  Минги тауну  жомакълы  табийгъатын бек жаратханбыз, таза  хауасы уа кюч къошханын да белгилеп айтырчады,  дегенди Запорожье областьны келечиси да.

Ишчи программагъа кёре, студентлени мастер-классла, жарыкъландырыу  жолоучулукъла  эм сейир адамла бла тюбешиуле да сакълайдыла. 

Эсге сала айтсакъ, «СтудПутевка», федерал проект Россей Федерацияны Илму эм бийик билим бериу министерствосуну башламчылыгъы бла бардырылады.