Миллетибизни хазнасы

Ёз тилибизде чыкъгъан  газетибизни хурметли  ишчилери, аны окъуучулары, мен Герпегежден Биттирланы Таусома. Манга токъсан жылдан атлагъанды. Менден тамата эр киши элибизде энди  жокъду. 

Ариу кюн орамгъа чыгъып, шинтикге олтурама. Былайтын ётгенле  келип саламлашадыла, саулукъ-эсенлик сорадыла. Кесим къалсам а, озгъан жылларымы, элими алгъыннгы адамларын эсгереме - хар бири бирер эл багъасы.

Барыбыз да колхозда ишлей эдик,  элибиз тюз да бир юйюр кибик эди. Бир юйде къууанч, башха жумуш болса да, аны эл саулай ётдюрюп болгъанды.

Кеслери уа къаллай ишчиле эдиле! Бир кезиуде колхозда эсепчи болуп тургъан эдим, хар адамны этген ишин санап. Кюннге гектардан артыкъ жер чалгъан эр кишиле бар эдиле. Тиширыула уа, къагъанакъ сабийлерин да биргелерине келтирип, кюннге 10-12 сотка жер чагалай эдиле. 

Ёз тилибизде  алгъыннгы  «Коммунизмге жол» аты бла чыкъгъан  газетибизде аланы юслеринден терк-терк басмалана тура эди. Парторг, газетни алып, бригадала ишлеген жерлеге барып, анда болгъан хапарланы, жангылыкъланы юслеринден айта эди.

Элде хар юй  ала эди газетни.

Бюгюн да «Заман» газетибизни бек багъалайма.  Аны  болгъаны  уллу насыпды миллетге. Анда ишлегенлеге Аллах къарыу, кюч берсин. «Заманыбыз» ёмюрлюк болсун! Ол бизни халкъыбызны байлыгъыды.