Тау лыжа курортлада солурукъланы саны кёбюрек болургъа ушайды

Бизни къыралда къыш туризм кезиу башланады. Анга хазырланыу къалай баргъаныны юсюнден РФ-ни экономиканы айнытыу министр Максим Решетников таматалыкъ этген кенгешде айтылгъанды. Аны ишине регионланы келечилери, сора Кавказ.РФ айнытыу институтну башчысы Андрей Юмшанов да къатышхандыла.

Бу институтдан билдиргенлерине кёре, къышда туризмге асламысында тау лыжа курортла себеплик этедиле. Былтыр аланы барында да сегиз миллиондан аслам адам солугъандыла. Ол а буруннгу жылны кёрюмдюсюнден тёртден бирине кёпдю.

«Россейни ичине жолоучулукъгъа адамланы жанындан сурам не заманда да уллуду. Борчубуз – аны жалчытыу бла чекленип къалмай, солууну бютюнда тап, тынгылы, къоркъуусузлу этергеди. Анга уа туризм инфраструктура айный баргъаны, власть эмда бизнес бирге келишип ишлегенлери себеплик этеди. Регионла да анга тири къатышадыла, башхалада болмагъанча аллай туризм продуктларын кёргюзтедиле», - дегенди Максим Решетников.

Тау лыжа туризм къышда бек изленеди. Аллай комплекслени Ассоциациясыны тергеулерине кёре, быйыл ёсюм эм азындан он процент боллукъду. Лыжалада учуу кезиу Минги тауда, Шерегешде, Кольский жарым айрыкамда башланнганды. Декабрьде уа алагъа Шимал Осетияда «Мамисон», Приморьеде «Арсеньев» къошуллукъдула. «Эльбрус» курорт, Алтайда «Манжерок» эмда Пермь крайда «Губаху» лыжачылагъа жарашдырылгъан тийрелерин кенгертгендиле эмда жангыртхандыла.

Туристлени саны кёбюрек болурча транспорт болум (жол) да игиленирге керекди. Бу жаны бла да бардыла ахшы жангычылыкъла эмда юлгюле: Краснодарда бла Геленджикде жангы аэропортла, «Эльбрус» эм «Архыз» курортлада адамланы бир билет бла ташыу тёре. Эм магъаналы курортла таба авиа- эмда темир жол билетлени багъаларына Правительстволу штаб кёз-къулакъ болады.

Солугъанланы къоркъуусузлукъларын жалчытыугъа да энчи эс бурулады. Битеу канат жоллагъа эмда аберилени кётюрюучю техникагъа Ростехнадзор къарайды, МЧС а тау бетледе къоркъуусузлукъну жалчытыугъа кёз-къулакъ болады.

Тири солургъа, ол санда походлагъа чыгъаргъа, таулагъа ёрлерге сюйгенлеге инструктор-проводниклени реестри жарашдырылгъанды. Ары киргенле бары да (алты мингден артыкъ инсан) аттестацияны ётген тынгылы специалистледиле. Адамланы жолгъа соргъан-сурагъан этмей чыгъаргъанлагъа эмда туризм жумушланы законсуз берирге кюрешгенлеге уа регион властьла тазир салыргъа эркиндиле.

«Кавказ.РФ-ни курортларында быйылгъы къыш солуу кезиуде 60 километр чакълы трассала ачыллыкъдыла. Тёрели той-оюн жумушла бла бирге «Завтрак с видом на Эльбрус» деген аудиогид ишлетип башларгъа сюебиз, сора алим гидле бла бирге талай экскурсияла бардырып, Минги тауну этеклерини илму хазнасын ачыкъларгъа умут этебиз. «Мамисонда» уа чыгъармачылыкъ резиденция ишлеп башларыкъды, шёндюгю искусствону галереясы ачыллыкъды; анда экспозицияла талай кере алышындырыллыкъдыла. Дагъыда беш уллу фестиваль ётерикди – макъамладан башлап, архитектурагъа дери жораланнганла», - дегенди Кавказ.РФ-ни башчысы Андрей Юмшанов.