«Оюмла»

Бу деген хапарчыкъны Сылпагъарланы Кулинаны «Кёмеуюл» деген китабындан алып басмалайбыз.  Кулина жютю къалам хаты болгъан жазыучу, поэт, фольклорист, алим, жашаугъа энчи къарамы болгъан къарачайлы тиширыуду. Аны суратлау дуниясы бла сизни аз-аздан шагъырей эте турабыз.

Ажал. Манга юч къауум адам келеди. Биринчи къауум: кеслери ёлселе да, адамлыкъларыны кючюнден атлары ёмюрлюкге жашарыкъла; экинчи къауум: кеслери эндиге дери жашагъан эселе да, адамлыкъ шартлары аракъыны кючюнден эртте ёлюп бошагъанла; ючюнчю къауум: жашауну тюз, адетдеча жашап ашыргъанла.

Жазыу. Ким не юй ишлесе, анда жашайды. Иги ишлеген – кесин махтайды, аман ишлеген – мени хыртлайды.

Къууанч. Чабакъны - къармакъ, къууанчны – адамлыкъ тутады.

Насыпсызлыкъ. Юйдегини эшигин ичги бла дауур ачсала, бирлешиу бла насып чыгъадыла да, мен киреме.

Аракъы. Адамны жазыгъы–хариби манга табыныр.

Къызгъанч. Манга бош кёлкъалды боладыла: кесимден артыгъым болса, ким угъай дейди, кимден да нени да аямаз эдим, артыгъым болургъа унамайды ансы.

Тилчи: Айтханнга гурушха этмейдиле да, айтханны айтханын айтханнга гурушха этедиле.

Эринчек: Коммунизмни: «Кимге да –  кереклисине кёре, кимден да – болумуна кёре»,- деген шартыны татыуун мен къалгъанладан алгъа ангылагъанма.

Сёзчю: Мен кесиме «комментатор» деген ариу атны атасам, манга да къынгыр къарауну къоярыкъдыла.