Усталыкъларын кёргюзтгендиле

«РусГидро» компанияны Къабарты-Малкъарда бёлюмюнде гидроэлектростанцияланы ишчилерини араларында  эришиу бардырылгъанды. Ол кёп болмай Къашхатау ГЭС-де ётгенди эмда бёлюмню станцияларында уруннганланы  кёллерин кётюрюуде магъаналы атлам болгъанды.

«РусГидро» компанияны Къабарты-Малкъарда бёлюмюнде гидроэлектростанцияланы ишчилерини араларында  эришиу бардырылгъанды. Ол кёп болмай Къашхатау ГЭС-де ётгенди эмда бёлюмню станцияларында уруннганланы  кёллерин кётюрюуде магъаналы атлам болгъанды.

Эришиу алтыгъа бёлюнюп  къуралгъан эди. Алты къауум да кеслерини билимлерин, усталыкъларын да кёргюзтгендиле. Энергетикле, биринчиден, норматив-техника документлени тинтиу бла кюрешгендиле, ызы бла авариялагъа къажау юйретиуге къатышхандыла, биринчи болушлукъ бере,  билиу эмда отну ёчюлтюу жаны бла хунерлерин да туура этгендиле. Хар къауумда станцияны сменини таматасы, машинала орналгъан залны башчысы, гидроагрегатланы машинисти эмда дежурный электромонтёр бар эдиле.

Эришиуню  эсебин чыгъаргъанда,  Черек ГЭС-ни  командасы бек кючлюге саналгъанды, экинчи жерге - Басхан ГЭС-ни, ючюнчюге уа Аушигер ГЭС-ни къауумлары тийишли болгъандыла.

Энчи номинациялада уа айырмалылагъа Анахаланы Алимни бла  Тимур Урусовну (Черек ГЭС), Чочайланы Мансурну (Зарагиж ГЭС) эм  Тамерлан Буговну (Басхан ГЭС) санагъандыла.

Хорлагъанладан Къабарты-Малкъарда бёлюмню жыйымдыкъ къаууму къураллыкъды.  Ызы бла ол битеуроссей эришиулени къыбыла жанында кесегине къатышырыкъды.
Компанияда айтханларыча, быллай магъаналы жумушла гидроэнергетика оборудованияны хайырланыуну игилендирирге, ишчилени хазырларгъа,  производствода къоркъуусузлукъну кючлендирирге себеплик этедиле.