«Хар бир инсанны жарсыуу да магъаналыды бизге»

Россей Федерацияны Президентини буйругъу бла субъектлени барында да Регионнга оноу этиу арала (ЦУР)  къуралгъандыла. Кёп болмай Къабарты-Малкъарда бёлюмю да кесини юбилейин белгилегенди.  Аланы магъанасы - жамауатны тилеклерине бла тарыгъыуларына къысха  заманда къараргъа эмда мадар  этерге.  Асламысында ала «Telegram», «Одноклассники», «ВКонтакте» социал сетьледен «Инцидент Менеджмент» амал бла алыннганладыла.

Кёбюсю, хар замандача, социал къоруулау, жашау журт-коммунал мюлк, тийрелени игилендириу, жолланы тапландырыу, саулукъ сакълау эм башха ишле бла байламлыдыла. Саулай алып айтханда, ара беш жылны ичинде 130 мингден аслам соруугъа къарагъанды. - Керекли мадар этилир ючюн, адамла бла байламлыкъда ишлей билирге керекди. Ара ачылгъанлы  биз  жерлешлерибизни жарсыуларына  тийишли халда эс бурулурча амалла къурагъанбыз. Бизге хар кимни  да жарсыуу магъаналыды. Ол себепден мындан арысында жерлешлерибизни ыразы этер, республиканы айныууна себеплик этер ючюн къолубуздан келгенни аямазгъа таукелбиз, - дейди   Къабарты-Малкъарны Регионнга оноу этиу арасыны таматасы  Мадина Кадыкоева.

РФ-ни Президентини эм Къабарты-Малкъарны Башчысыны буйрукълары бла  муниципал аралада ЦУР-ну бёлюмлери ачылгъандыла. Ала жер-жерли администрациялагъа жамауатны тарыгъыуларына къысха заманда эм тынгылы жууапла  тапдырырча цифралы онгла бла жалчытадыла.

Жамауат бла ачыкъ сёлешиуге аслам эс бёлюнеди. Анга кёре беш жылны ичинде араны келечилери администрацияланы, ведомстволаны эм службаланы келечилери бла эки жюзден артыкъ тюзюнлей эфир бардыргъандыла. Аны кезиуюнде адамланы жарсытхан юч мингден аслам тилекге бла тарыгъыулагъа  къаралгъанды, аланы иги кесеги толтурулурча  мадар этилгенди.   

ЦУР регионну информация бла жалчытыргъа да  болушады. Араны специалистлери ётюрюк билдириулени мычымай  тинтип, кенг жайылмазча мадар этедиле. Къырал къуллукъчуланы да инсанла бла байламлыкъда ишлерге, ол санда цифралы амалланы хайырланыргъа юйретедиле. Ол мурат бла 150 семинар бардырылгъанды, алагъа 1,5  минг адам къатышханды. Дагъыда араны келечилери къырал учреждениялагъа  эки мингден артыкъ паблик хазырларгъа болушхандыла. Аланы хайыры бла адамла сорууларын бераллыкъдыла, жангылыкъла, магъаналы  билдириуле бла да шагъырей болаллыкъдыла. Анга кёре  эм тири ишлеген ведомстволаны ачыкълар муратда рейтинг бардырылады.

Сагъынылгъан кезиуде араны келечилери социал жаны бла жюзден артыкъ соруу бардыргъандыла. Аны бла бирге бюгюнлюкде беш мингден аслам контент басмаланнганды. Аланы кюн сайын мингле  окъуйдула. 

Араны  ишчилери социал, экология эм жандауурлукъ акциялагъа  да тири къатышадыла. Къыйматлы проектлени бардырыргъа себеплик  этедиле. Бюгюнлюкде ара къырал политиканы инсанланы болумларын игилендириуге уллу къошумчулукъ этген, къыралны  бла жамауатны арасында байламлыкъны кючлеген, магъаналы кесеги болгъанды деп   таукел айтырчады.  
Эсгертиу! Регионнга оноу этиу ара офис халда ишлемейди, «Инцидент менеджмент» бир тюрлю соруугъа эс бурур ючюн, ол социал сетьлени биринде жазылыргъа керекди. Ол санда кемчилик тынгылыракъ ачыкъланса игиди.