Къудуретни тазалай сакъланырына атап

Яникойдан Къудайланы Тебо 2025 жылны Битеуроссей акселерация программасына къатышханды. Аны чеклеринде бардырылгъан тёрт конференцияны кезиуюнде эмда «Экватор» кесегинде хунерли жаш аш-азыкъда бир кере хайырланылгъан адырланы, бош атып къоймай, экинчи да жарарча этиуню юсюнден проектин кёргюзтгенди. Кир-кипчикни жангыдан жарашдырып хайырланыуну магъанасы шёндю бек уллу болгъаны эсге алынып, проект акселерация программаны экинчи кесегине сайланнганды.

Къудайланы Тебону иши бек къыйын экология проблемаладан биринден къутулуугъа бурулупду. Ол да неди десегиз, бир кере хайырланылгъан адырланы асыры кёп жюрютюу эмда аланы утилизацияларын терс бардырыу. Хунерли жаш кёргюзтген амал технология, экология жаны бла хайырланылыргъа эмда ишге сингдирирге  жараулуду. Ол себепден проектни къыралны тюрлю-тюрлю регионларында хайырланырча къыйматы барды. 

 14 декабрьде проект бла экспертледен къуралгъан жюри, инвесторла эмда ол ишге къошумчулукъ  этгенле да шагъырейленирикдиле. Бу магъаналы атлам таулу жашны башламчылыгъын жашауда бардырыргъа, кенгнге жайылыргъа, айный  барыргъа да жангы онгла ачаргъа боллукъду.