Къайда да жууаплылыкъны терен сезгенди

Газетибизде дайым да эллерибизде, шахарларыбызда жашап, кеслерини ызларындан ахшы ыз къойгъанланы юслеринден эсгериуле басмаланнганлай турадыла. Аланы уа бизге таныгъанлары, билгенлери жазып да жибериучюдюле. Бу жол а Жангоразланы Фатиманы Черек районну Къашхатау элинден  Мокъаланы Абуканы юсюнден эсгериуюн басмалайбыз.

Къашхатаучу Мокъаланы Абуканы, жаланда бир эллилери угъай, саулай да Черек районну жамауаты бюгюнлюкде да хурмет бла эсгергенлей турады. Аны жашау жолу ишге уллу сюймеклик эмда муратына жетерге итиниулюк адамны эсленирча жетишимлеге  къалай келтиргенлерини шагъатыды. Кеси заманында Мокъа улу Москваны бийик окъуу юйлеринден биринде экономика жаны бла билим алгъан эди.

Усталыкъ, жууаплылыкъны сезген  даражалары бийик болгъанлары себепли иши бла байламлы жумушланы неда жамауатны излемлерин тынгылы тамамлай билгенди. Колхозлагъа эмда совхозлагъа аланы айныу жолларыны башха-башха кезиулеринде башчылыкъны жетишимли этгенди. Озгъан ёмюрню алтмышынчы жылларында бу бёлюмледе сагъышландыргъан затла уа аслам эдиле. Аны ючюн а тийишли, тюз да оноуну эте билирге керек болгъанды. Абука Барасбиевич этген оноу а эм керекли болгъанын заман ачыкълагъанды эмда аны биргесине ишлегенлени туудукълары бюгюнлюкде окъуна, анга ыразылыкъларын айта, ыспас этгенлей тургъанлары да аны ючюндю.

Ангылайбыз, жамауатны эсинде  аллай,  элни, аны бла бирге уа районну, республиканы да айныуларына магъаналы юлюш къошхан керти инсанла къаладыла. Мокъа улуну иш  кёллюлюгюню, бирсилеге да аны сюйдюре билиучюсюню юсюнден бусагъатда да кёпле айтадыла.

Абука Барасбиевич районда жууаплы къуллукълада уруннганды. Белгилегенибизча, он жылдан аслам заманны Герпегежде «Шуёхлукъ» колхозгъа башчылыкъ этип тургъанды. Ол кезиуде уа мюлк эм артха къалгъанланы санындан районда алчыланы тизмесине къошулгъанды. Колхозну жайлыкълары болгъан жерге дери жолну ишленнгени уа эм уллу жетишимледен бири эди ол кезиуде. Аланы биргелерине Мокъа улу кеси да ишлеген эди.

Жайлыкъгъа жаяулай,  машинала бла жюрюгенле бирча чыгъаргъа онгну барлыгъы уа мюлкню малчылыкъ жаны бла файдасын иги да ёсерине себеплик да болгъанды. Колхоз къыралны  эт эмда сют бла жалчытыуда салыннган планны жылдан жылгъа мардасындан да асламгъа толтуруп тургъанды. Аны ючюн а партияны  райкомуну  кёчюучю Къызыл байрагъы бла бир ненча кере саугъаланнганды. Эм ахшы сют сауучу Кучмезланы Абдул-Керим а ишде бийик эсеплери ючюн Кубада къуралгъан жаш тёлю фестивальгъа баргъанды.

Ызы бла Абука Барасбиевични Къашхатауну «Къызыл Малкъар» мюлкюне кёчюредиле. Къысха заманны ичинде ол аны айныуну жолуна салады. Андан сора да, Мокъа улу аслам жылны заготбазаны таматасы болуп, аны ишин да къуралыулу барырча этген эди. Дагъыда ол райисполкомну бёлюмлеринден бирине башчылыкъ этип тургъанды.

Аны окъуулу, билимли инсан болгъаныны эмда керекли оноуну чыгъара билгенини себебинден, белгиленнгенича, аслам ахшы иш тамамланнганды. Аны ючюн а аны районну эмда республиканы къуллукъчулары сыйлы грамотала, майдалла бла да саугъалагъандыла. Бюгюнлюкде да аны адамлыкъ ышанларын, халкъгъа тынчлыкълы болурча, ишни алай тап къурай, бардыра да билгенин кёпле эсгергенлей турадыла. Ол дуниясын алышханлы энди отуз жылгъа  жууукълаша эсе да,  кесини ызындан ахшы ыз къойгъанды.

Аны уллу эмда шуёх юйюрюнде сабийле да,  хурметли инсанла болуп, ахшы тёрелеге тийишлиликде жашайдыла эмда ишлейдиле. Тамата къызы жетишимли врачды, бирси уа алимди. Жашлары юристледиле, жашауда тюзлюк болуруна къуллукъ этедиле, жангы проектлени бардырадыла. Башхача айтханда уа, юйюрде саулукъ сакълауда, журналистикада, эл мюлкде, илмуда ишлегенле бла бирге депутатла да бардыла.

Абука Барасбиевични жашауу, къадары да, кесини жюрек излемине, къыйматлагъа да кертичилей къала, адам аны бла бирге жетишимли болургъа, ахшы юйюр ёсдюрюрге эмда жамауатны эсинде хурметли инсанча, жарыкъ сыфатда къалай къалалгъаныны  юлгюсюдюле