MAX – не затды?

Шёндюгю дунияда, интернет, технологияла терк айнып баргъан жашауда информацияны табыу, хайырланыу, бир-бирге жибериу да терклик излейдиле. Кёпле энди,  алгъынча,  бир бирге телефон бла сёлешип къыйналмай,  жазып къоядыла, сурат неда видео жибередиле. Сюйселе уа,  видеосвязь бла бетден - бетге ушакъ этерге боллукъдула. Аллай амалланы смартфонлада мессенджер приложенияла бередиле.

Мессенджерлени къадар тюрлюсю барды. Аланы саны барыбыз да билген WhatsApp, Telegram, Viber, VK бла чекленип къалмайды. Сёз ючюн, Къытайда WeChat бла Tencent QQ кенг хайырланадыла, Японияда бла Къыбыла Кореяда LINE деген, Индияда - Sandes, Иранда уа Bip ишлейдиле. Аладан сора да, быллай энтта да кёп приложенияла бардыла. Арт кезиуде Россейде жангысы чыкъгъанды - МАКС. Бу мессенджерни аты ингилизча жазылады – MAX деп. Ол неге керекди, аны не ючюн къурагъандыла, кесини да бирсиледен не башхалыгъы барды?

Бу сервис быйыл жаз башында ишлеп башлагъанды. РФ-ни Президенти июньда миллет мессенджер къураргъа оноу этгенинден сора аны аты чыкъгъанды. Алай бла энди бизни къыралда сатылгъан битеу жангы смартфонлада ба планшетледе MAX болургъа керекди.

Жайны ал кюнлеринде анда жюз минг чакълы адам эсепге тюшген эдиле, сентябрьде уа аланы саны отуз миллиондан атлагъанды. Ол смартфонланы битеу тюрлюлеринде, сора компьютерледе да ишлейди. Аны WhatsApp неда Telegram приложенияладан артыкъ уллу башхалыгъы жокъду: алача бир бирге жазаргъа, сурат, видео, документле жиберирге, связьгъа чыгъып сёлеширге неда кёрюшюрге жарайды.

Айтханларына кёре, ол «Госуслуги» портал бла ишлеп башларыкъды, сора башха сервислеге къошулуп, быллай жумушланы тындырыргъа онг берликди: такси чакъырыу, абери сатып алыу, пошлинала эмда тазирле тёлеу, электрон халда къол салыу, башхалагъа ахча кёчюрюу. Ахыргъы амалны шёндю жаланда талай банк береди, алай артда аланы саны кёбюрек боллукъду дейдиле.

Алай бла WhatsApp-дан неда Telegram-дан аны артыкъ уллу башхалыгъы жокъ эсе, ол неге керекди?

Специалистле айтханларына кёре, эм биринчиден,  MAX – Россейни инсанларына деп этилгени себепли, ол мында – къыралда таплыкъгъа деп жарашдырылгъанды. Башхача айтханда, сагъынылгъан жумушланы бир-бирлерин, сёз ючюн, «Госуслуги» портал берген амалланы, «Цифралы ID» дегенни, тёлеулени, GigaChat сервис бла байламлыкъны жаланда ол жалчытады. Бирсиле бла тенглешдиргенде ол Россейни законларына толусунлай бойсунады, битеу тийишдирген,  информациясы да бизни къыралны ичинде сакъланады.

MAX жангы приложенияды, аны себепли энтта да айный барлыгъы баямды. Аны къурагъанла айтханларына кёре, келир кезиуледе ол «Госключ» эм «Госуслуги» сервисле бла жууугъуракъ боллукъду. Ол къуру мессенджер угъай, медиа, финтех, къырал жумушланы бир жерде жалчытхан платформагъа айланырыкъды. Сёз ючюн, кёп болмай анда чыкъгъан «Цифровой ID» амалны хайырындан адам кесини инсанлыгъына (къагъыт документлерин кёргюзтмей) шагъатлыкъ этерге, жыл санын, социал даражасын (пенсиячы, студент, кёп сабийли ата-ана…) билдирирге боллукъду.

MAX-ны жашыртын хайырланыргъа онг жокъду, нек дегенде анда регистрация жаланда Россейни неда Беларусьну телефон номерлери бла этиледи. Аны хайырындан тыш къыраллада олтургъан аманлыкъчылагъа бери жол жабылыр деп ышаныу да барды.