Къызлагъа окъуугъа жол къачан ачыла башлагъанды

15 ноябрьде 1796 жылда битеудунияны тарыхында тюрлениу болгъанды. Американы Бирлешген Штатларында къызлагъа деп окъуу школ ачылгъанды. Ол XVIII ёмюрде таукел атламладан бирине саналгъанды, тиширыуланы бла эркишилени араларында тенгликге жол салыннганды.

Ары дери тиширыулагъа билим бериуге эс бурулмагъанды. Аланы юйюр жашаугъа хазырлагъандыла, башха билим бериуню юсюнден сагъыш этмегендиле. Бу болум тиширыуланы баш эркинликлерине, окъуу алыуларына, сайлау этиулерине элтирик таукел атлам болгъанды.

Андан бери 200 жылдан артыкъ заман озгъанды. Бюгюнлюкде билимге жол тиширыугъа Европада, Америкада, Кавказда да бирча ачыкъды.

Бизни республикабызда да билим алыуда, билимлерин хайырланыуда да тиширыуларыбыз юлгюлюдюле. Ала бийик билим аладыла, кандидат, доктор диссертацияларын къоруулайдыла, университетледе окъутадыла, министерстволада ишлейдиле, битеудуния проектлени хазырлауда да бет жарыкълы урунадыла.

Бюгюнлюкде Къабарты-Малкъар республикада тиширыуланы билим алыулары заманны излеми болуп къалмай, миллет ёхтемликди дерге боллукъбуз. Ала ишлей, жашай, жетишимли да бола да билгенлери хар не затда да эсленеди. Тиширыула миллетлерини адет-къылыкъларын сакълай, ёсюп келген сабийлерин низамгъа сыйындыра, билим алыргъа, жетишимли болургъа да кёллендиредиле.

Ким биледи, бюгюн мектепледе окъуй тургъан къызчыкъланы арасында да тамбла битеудуниягъа кеслерини билимлери бла, фахмулары бла, жетишимлери бла атларын айтдырлыкъла да аз болмазла. Уллу жетишим гитче затдан башланады.

15 ноябрь битеудунияда къызчыкълагъа окъуу юйлеге эшик ачылгъан кюнча белгиленеди.