Туризмни айныта, табийгъатны сакъларгъа кереклисин да унутмазгъа

Къабарты-Малкъарны Жамауат палатасыны энчи сайтында билдирилгеннге кёре, къыралны Правительствосу Шимал Кавказда туризмни айнытыугъа 12 миллиард сом бёллюкдю. Аны юсюнден бегимге РФ-ни Правительствосуну Председатели Михаил Мишустин бу кюнледе къол салгъанды.

Бу ахчагъа туризмни мекямлары эм тау-лыжа инфраструктура канат эм тау-лыжа жолла ишленирикдиле, курортла жалгъан къар этген системала, курт тюшюуден, жер юзюлюуден сакълагъан эм башха керекли оборудование бла жалчытыллыкъдыла. Министрлени кабинетини оноууну юсюнден республиканы Жамауат палатасыны экономика, жашау журт-коммунал мюлк, къурулуш, курортла эм туризм жаны бла комиссиясыны башчысы Владимир Павленко билдиргенди.

- Алай бла 2030 жылгъа регионда солугъанланы санын 2,5 миллионнга жетдирирге мурат барды. Жолла тапландырылгъанлары, транспорт онгла игилендирилгенлери, жангы турист жумушла къуралгъанлары уа анга себеп боллукъдула. Минги тауну тийресин айбатландырыу, анда инфраструктураны игилендириуге, санаторийлени жангыртыугъа, туризм эмда къонакъбайлыкъ жаны бла ишлерик адамланы билимлерин бла усталыкъларын ёсдюрюуге энчи эс бёлюнюрюкдю.

Жолоучулукъланы санын ёсдюрюу, эко-туризмни айнытыу, альпинизм, санатор-курорт багъыу - ала барысы да республикабызны жетишимлилигини мурдорудула. Сейир-тамаша табийгъатыбыз, бай маданиятыбыз, къонакъланы жумушларына тынгылы къарау а бери аслам адам келирине, шёндюгюлю излемлеге келишген къонакъ юйлени къурулушларын бардырыугъа себеплик этерикдиле, - дегенди Владимир Павленко.

Айныу дайым да эсленеди: жылдан-жылгъа къонакъла къалырча жерлени саны кёбейеди, солугъанла заманларын зауукълу-ырахат ётдюрюрча жерле ачыладыла, белгили курортла тохтаусуз жангыртыладыла. Келир жыллада федерал бюджетден жангы къонакъ юйлени къурулушларына, айтылгъаныча, 740 миллион сом берилликди, деп билдиргенди докладчы.

Ич туризмни айнытыуну дагъыда башха терен магъанасы барды – ол миллетлени араларында шуёхлукъну кючлейди, къыралны бирлигин, маданият байлыгъын сакълаугъа болушады. Туризм, жангыз да солууну бла саулукъну кючлеуню амалларындан бири болуп къалмай, миллетле аралы байламлыкъланы тохташдырады, регионну экономикасын да байыкъландырады, деп чертгенди Павленко.

Къарачай-Черкесни Жамауат палатасыны экономиканы айнытыу, агропромышленный мюлк эмда социал жумушланы тамамлагъан коммерциялы болмагъан организациялагъа себеплик этиу жаны бла комиссиясыны башчысы Эльдар Кишмаховну оюмуна кёре да,  бу атлам республиканы экономика болумун игилендирликди, аны хайыры бла жангы ишчи жерле да къураллыкъдыла. 

Бийик таулу, тамаша Къарачай-Черкес Республикада тау-лыжа туризмге уллу эс бёлюнеди. Берилген ахчагъа болгъан курортла жангыртылгъандан сора да, жангылары  ишленирикдиле. Анга кёре уа туристле бютюн кёп келирлерине ышанырчады. Былайда жер-жерли халкъланы, предпринимательлени да сейирлерин унутургъа жарамаз. Аны ючюн властьланы, бизнесни эмда жамауатны араларында келишиулюк болургъа тийишлиди. Аны бла бирге башламчылыкъла къудуретге хата салмазларына, табийгъат хазнабыз келген тёлюлеге сакъланырына да къайгъырыргъа керекди, - дегенди ол.