Жол белгиле тюрленирикдиле

Россейде 2026 жылны  1 январында жангыртылгъан ГОСТ ишлеп башларыкъды. Анга кёре талай жангы жол белги чыгъарыкъды эмда машинала салыннган жерлени  ёлчемлери   да башхаракъ боллукъду. Бу тюрлениуле къоркъуусузлукъну игилендирир хыйсап бла кийириледиле, деп белгилегендиле жоллагъа къарагъан «Кавказ» управленияда.

Жангы белгиле  быладыла:

● «Глухие» — къулакълары осал эшитгенлени юслеринден эсгертирикди. Аны тийишли больницаланы эмда энчи школланы къатларында  орнатырыкъдыла;

● «Стоп-линия» — ёре  белгиди. Аны «жатхан» белги орнатыргъа онг болмагъан жерледе саллыкъдыла;

● «Обледенелое и влажное покрытие» — ол «Скользкая дорога» эм «Мокрое покрытие» белгилени орунуна кийириледи. Кеси да тынчыракъ барыргъа, улоуну ашыгъыш тыймазгъа чакъырады;

● «Время действия» — алгъынча белги неллай бир заманны ишлегенин кёргюзтюрюкдю. Алай анда энди къуру сагъатла бла кюнле угъай, айла да жазыллыкъдыла;

● «Рекомендуемая скорость при проезде искусственной неровности» — «жатхан полициячыгъа» жете туруп нечик терк неда шош барыргъа кереклисин кёргюзтюрюкдю.

Парковка дегенде уа, энди жол жанында аллай жерлени кенглиги 25 сантиметрге тарыракъ боллукъду – 2,5 метрден 2,25. Узунлугъу уа тюрленирик тюйюлдю - шёндюча 6,5 метрлей къаллыкъды.