«Узакъда да ана тилибизни унутмайбыз»

Республикадан тышына кетип, окъууда, ишде, илмуда да жетишимле болдургъан жашларыбыз, къызларыбыз бла барыбыз да ёхтемленебиз.   Бу кюнледе  мен дагъыда аллай бир жашыбыз  Черкесланы  Рустам бла танышханма. Ол  Къашхатауда  ёсгенди. Москвада   юйюрю бла жашайды,  «Мосинжпроект» институтну  генеральный директоруду. Мындан алда анга «Москва шахарны сыйлы къурулушчусу» деген  ат берилгенди. Биз аны бла,  телефон бла  сёлешип, ушакъ этгенбиз.

– Рустам, сыйлы саугъанг бла алгъышлайбыз, ызы къалын болсун!

– Сау болугъуз!

– Мектепден сора  къайда окъугъанса?

-1998 жылда   Къабарты-Малкъар къырал эл мюлк академияны «Энергия бла жалчытыу» бёлюмюне  киргенме.  Андан сора  Москвада энергетика институтну аспирантурасында окъугъанма. Аны  бошагъандан сора ара шахарыбызда къалгъанма.

–Къайсы предприятияда башлагъанса урунуу жолунгу уа?

-Москвада Метрополитенни къурулуш проектин эмда транспорт инфраструктурасын жарашдырыучу  бёлюмюнде.  2015 жылда  ара шахарны правительствосуну «Мосинжпроект» холдингине кёчгенме. Анда  проект ишле жарашдырыу жаны бла управленияны таматасыны къуллугъуна салгъандыла. 2017 жылдан а анда  проектле жаны бла кесегине таматалыкъ  этеме. Башлагъан а проект дирекцияны таматасыны къуллугъундан этген эдим. 2019 жылда  проектле жарашдырыу жаны бла генеральный директорну орунбасарыны къуллугъунда да бир ненча айны  ишлегенме. Арт юч жылда уа башда айтылгъан институтха башчылыкъ этеме.

– «Мосинжпроект»  не бла кюрешгенини юсюнден тынгылы хапар айтсанг эди.

– Ол ара шахарыбызны къурулуш рыногунда алчылыкъны тутады, Россей Федерацияны бек уллу инжиниринг холдингиди, Москва метрополитенни  ёсдюрюу эмда кючлендириу программасыны операторуду, бек  керекли жол объектлени генеральный проектировщигиди эмда заказчысыды.  Мен анга  башчылыкъ этген 2011-2023  жылланы  ичинде Москвада  метрону  узунлугъу  бир бла жарым кереге  созулгъанды, башхача айтханда,  200  километр   къошулгъанды,  109   станция эмда тёрт орталыкъ москва кольцо ишленнгендиле.

Компания, андан сора да,   кёп белгили  къурулуш проектлени жашауда бардыргъанды, ол санда «Лужники» уллу  спорт аренаны, «Зарядье» паркны,   дагъыда аллай аты бла концерт залны, «Геликон – опера» театрны.

– Тамамланылгъан  магъаналы  ишлеге сени уллу къыйынынг киргенди десек, ётюрюк болмаз да?

– Ишими бек сюеме, анга битеу  кючюмю салама, алайсыз иш тынгылы болмайды. Махтаннган сунмагъыз, башда айтылгъан ишлени тамамлаугъа, сёзсюз, кёп къыйыным  киргенди. Талай заманны ичинде ишими бийик даражада бардыргъаным ючюн  кёп ыспас сёз да эшитгенме, махтау къагъытла да алгъанма. Аланы санында Москва шахарны мэри Сергей Собянинни эмда аны орунбасарыны  белгилери, ара шахарны къурулуш жаны бла департаментини сыйлы грамотасы да бардыла.

–Бет жарыкълы уруннганынг бла да къалмай, ахшы ата болгъанынгы да билеме.

–Юй бийчем бла бирге юч сабий ёсдюребиз, аланы гитчеликден окъуна иш кёллю, таза  ниетли болургъа юйретебиз. Туугъан жерибизден узакъда тургъанлыгъыбызгъа, тилибизни унутмайбыз, сабийле да билирча мадар этебиз. Шёндюгю дунияда алайсыз жарарыкъ тюйюлдю. Кесиме уа жашауда атам Хасан бла анам Сакинат юлгю болгъанлай турадыла. Сабийлеге да жашауда аладан юлгю алсагъыз жангылмазсыз, дегенлей турама. Аланы  бир бирлерине сакъ болгъанларына, къоншула бла жарашып жашагъанларына, къарыусузгъа жан аурута билгенлерине къарагъан адам сукъланмай къалмайды.

–Аланы терк-терк жокълаймысыз?

–Жылны ичинде  манга артыкъ кёп солуу кюн чыкъмайды, болсада,  онг табып, эки-юч кюннге окъуна  Къашхатаугъа жетмей къалмайма. Сабийлени  жай солууларында уа элде къоябыз. Ала  ана тилни бютюн дурус билип къайтадыла. Ол да къууандырады  мени.  Атам, анам да  бусагъатда пенсиядадыла. Солуугъа  чыкъгъынчы бир кюнню да ишлерин къоймагъандыла. Экиси бирге  жашау этгенли къыркъ жылдан артыкъ болады.

Атам Черкесланы Борисни жашы Хасан Къабарты-Малкъар къырал университетни «Зоотехния» бёлюмюн бошагъанды. Совет районда Госстрахда бла  статистика бёлюмде  кёп жылланы ишлеп тургъанды. Анам Мисирланы Абдулланы къызы  Сакинат   Искусстволаны Шимал-Кавказ къырал институтуну маданият  колледжин бошап, кёп жылланы Огъары Малкъарда китапханада ишлеп тургъанды.

Гитче къарындашым Руслан шашкаланы, шахматланы, музыканы бек сюеди. Эгечим Лейля да, Къашхатауну мектебин 2001 жылда алтын майдалгъа  бошап, Къабарты-Малкъар къырал университетни филология бёлюмюне  кирген эди. Аны да 2007 жылда къызыл дипломгъа бошагъанды. Кёп жылланы ичинде  Черек  муниципал районну билим бериу эмда жаш тёлю политика управлениясында бет жарыкълы ишлейди.

– Рустам, ишинг жууаплыды, сёзсюз, бош заманынг да хазна болмаз, анга да къарамай, мени сорууларыма тынгылы жууап берирге онг тапханынг ючюн   сау бол, жашауунгдан, ишингден да къууан!