Кючюне кирген законланы юслеринден

Кюз арты-къыш кезиуде жылытыугъа хазырланнганда ачыкъланнган кемчиликлени кетермегени ючюн тазир салынады, тыш къыралланы агентлерине жууаплылыкъ къатыланнганды, энчи аскер операциягъа къатышхан аскерчилени юйюрлерине болушлукъ... Бу статьяда ноябрьде кючюне кирген федерал законланы юслеринден билдирирге сюебиз.

 26 октябрьден ишлеп башлагъан жорукълагъа кёре, «тыш къыралны агенти» ат берилгенле тохташдырылгъан низамны жылны ичинде бир кере   бузсала,  экинчи жол  уголовный жууап тутарыкъдыла. Алгъын а эки административ бузукълукъдан сора ачылгъанды уголовный иш.

27 октябрьден  энчи аскер операцияны аскерчилерини юйюрлерине себепликни жангы мадарлары ишлеп башлагъандыла.  Юйюрню кечиндирген инсан ауушханы бла байламлы пенсия тохташдырыуну юсюнден дауну сюдге берген кезиуде  къырал тёлеуле этилмейдиле.

  1 ноябрьден башлап  мобил  байламлыкъ жаны бла жангычылыкъла ишлеп башлагъандыла. Законда белгиленнген жорукъла сакъланмасала, сотовый байламлыкъны операторуна абонент номерни ишин тохтатыргъа эркин этилгенди. Алагъаракълада уа бир адамны атына 20 сим-картадан кёбюсюн жарашдырыргъа жарамагъаны тохташдырылгъанды. Тыш къыраллыгъа уа - 10-дан.  Бу низам бузулса да, абонентни жумушларын толтурмай къояргъа боллукъдула.

 Инсан налогну тёлемей, борч жыйылса, ахчаны сюдню оноуу болмай тыяргъа эркин этилгенди. Быллай оноу налог органны буйругъу бла кийирилгенди.  Инсан налогну ёлчемин терсге санаса, 30 кюнню ичинде аны дауларгъа боллукъду.

  7 ноябрьден энтта бир   жангы закон ишлеп башлагъанды. Анга кёре, къыш жылытыу кезиуге хазырланнганда, алгъын ачыкъланнган кемчиликле кетерилмегени белгили болса,  тазыр салынады. Жууаплы къуллукъчулагъа ол 10 минг сомгъа, организациягъа уа 40 минг сомгъа жетеди.

Дагъыда Россейде аманлыкъ этип, башха къыралда букъгъан инсаннга ачылгъан тарслеу документлени прокуратура тыш къыралгъа ашырып, бузукъчуну жууапха тартылырын излерге боллукъду. Бу низам аманлыкъчы жууапдан къачмаз ючюн кийириледи.

 Биреуню мюлкю  башха адамгъа къалгъан кезиуде, аны кредит борчу болгъаныны юсюнден алгъадан белгили этилликди. Нотариус наследство жаны бла ишни ачхандан сора юч кюнню ичинде ауушханны кредит борчлары болгъанларыны  юсюнден шартланы жыйышдырыргъа керекди. Ызы бла аланы мюлкю къалгъан адамгъа билдиреди.