Къонакъла, жерлешлерибиз да билирча

Быйыл "Иги шахар болумну къурау" къырал программагъа кёре Черек районда Къашхатаугъа, Огъары Жемталагъа, Жемталагъа эмда Герпегежге кирген жерледе стелала ишленнгендиле эм жангыртылгъандыла,  деп билдириледи КъМР-ни  Къурулуш эмда жашау журт -коммунал мюлк министерствосуну  пресс-службасындан.

Белгилисича, Къабарты-Малкъар туризм жаны бла къыйматлы регионладан бирине саналады. Солугъанланы бери  жомакълы табийгъатыбыз эм тамаша жерлерибиз да  тартадыла.  Хар элибизде кесича энчиди.  Ол себепден   аланы атлары эсде къалырча этиуню магъанасы уллуду.    

Стела кеси энчи сюелген  архитектура эсгертмеди. Анда элни, шахарны атлары, къачан къуралгъанлары, тарыхларындан, жашауларындан да   магъаналы шартла жазыладыла.   Алай бла ол, элни адамын, жерин танырдан алгъа биринчи оюмун къураргъа болушады. 

Герпегежни  стеласыны юсюнден айтханда, ол   Россейни байрагъыча "триклор" тюрсюнлюдю.  Ол эм биринчиден къайсы къыралда жашагъагъаныбызны кёргюзтеди.  Андан  тышында,  тёгерекдеги къудуретге къарарча айбат майдан да къуралгъанды. Жолоучу солурча шинтикле,  кир-кипчик атарча орунла жарашдырылгъандыла,  чыракълы чыпынла орнатылгъандыла эм къоркъуусузлукъну жалчытырча  тёгереги бла буруу да тартылгъанды.  Аны бла бирге тёгерек-башны жашиллендирирча эм айбатландырырча да мадар да этилгенди.