Окъуучуланы адабиятха сейирлерин ачар ючюн

Барыбыз да билгенликден, «Живая классика» атлы эришиу жыл сайын да бардырылады. Анга 2026 жылда къатышыргъа сюйгенле уа кеслерини заявкаларын 2025 жылны ноябринден башлап, 25 январьгъа дери берирге эркиндиле.  Конкурсну РФ-ни Жарыкъландырыу министерствосуну башчылыгъында болгъан фонд къурайды эмда бардырады.

«Живая классика» - ол къыралда  адабият чыгъарманы эшитдирип кёлден окъуудан эм уллу эришиуге саналады.  Анда 10-17-жыллыкъ окъуучула ачыкълайдыла хунерлерин. Анга Россейни битеу да регионларындан мингле  бла саналгъан сабийле къатышадыла. Ала россейли неда тыш къыраллы жазыучуланы къара сёз бла жазылгъан  суратлау чыгъармаларындан кеслери сайлагъан юзюкню орус тилде эшитдирип окъуйдула. Юзюк магъанасы бла сайланыргъа тийишлиди эмда аны шатык окъуп хазырланыргъа, сёлешиуню эмда дикцияны мардаларын да сакълай билирге керекди.

2026 жылда эришиуге энчи жангы бёлюм да къошуллукъду. Ол а «Илму фантастикады». Белгилисича, аны регион урумунда хорлам болдургъанла конкурсну къырал даражалы кезиуюне къатышадыла. Битеуроссей ахыр урумунда холагъанлагъа уа суперфиналда  Москвада Къызыл майданда чыгъарманы окъургъа эркинлик бериледи.

Конкурсха къатышыргъа излегенле 5-11 класслада окъургъа керекдиле. Колледжлени бла техникумланы окъуучулары да боллукъдула анда хунерлерин ачыкъларгъа. Алай эсе да, жарым финалгъа бла къырал даражалы урумгъа ала жаланда онлайн халда къатышыргъа эркиндиле.

Эришиуню  мураты школчуланы китап окъуугъа, адабиятха сейирлерин ачыу бла байламлыды. Аны бла бирге уа суратлау чыгъарманы магъанасына эс бурдурууду эмда ариу, шатык сёлеширге юйретиудю.
Конкурсну Битеуроссей суперфиналында хорлагъаннга юч адам саналлыкъды. Алагъа дипломла эмда спонсорладан саугъала да берилликдиле.