Ёсюмню себеби – тири къармашыу

Быйыл жылны башындан бери Къабарты-Малкъарда тууар эмда  юй къанатлы  этден (союлмагъан ауурлукъда) эл мюлклени барысында да 37,6 минг тонна сатылгъанды. Ол былтыр бу заман   бла тенглешдиргенде,  20 процентге кёпдю, деп билдириледи КъМР-ни Эл мюлк министерствосуну пресс-службасындан.

Этни асламысы неда 31 минг тонна  юй къанатлыланыды.  Тууарладан бла  ууакъ аякълы малладан да  5 эм 1,6 минг тонна жарашдырылгъанды.  Продукцияны иги кесегин неда   18,8 минг тоннаны Прохладна район чыгъаргъанды. Ызы бла Урван эм Чегем районла барадыла. Алагъа да 6,7 эм 4,4 минг тонна жетеди. 

Эсге сала айтсакъ, быйыл майда  Кавказны инвестициялы форумунда КъМР-ни Башчысы  Казбек Коков келир заманда  юй къанатлыла ёсдюрген  уллу фабриканы къурулушу башланырыгъын айтхан эди. Ол ишлеп башласа,  жылгъа 30 минг тонна эт эм 36 миллион чакълы жумуртха сатаргъа онг боллукъду.

Проект 2030 жылдан кеч къалмай жашауда бардырылыргъа керекди.  

Жумуртхаладан да быйыл тогъуз айгъа республикада 29 миллион чакълысы сатылгъанды. Ол былтыр бу заман бла тенглешдиргенде 5,3 процентге кёпдю. 
Бюгюнлюкде аланы иги кесеги  неда 28,8 миллион чакълысы  Басхан, Прохладна эм Май районлада алыннгандыла.  
 Былтыр бу заман бла тенглешдиргенде  алада  жумуртхаланы  саны  8,2,  7,6 эм 0,8 процентге ёсгенди.