Билим бериуню жангы амалларын сюзгендиле

Ана тиллени бла адабиятланы жаш устазлары кенгеширик жерге Къабарты-Малкъар бошдан сайланмагъанды – республика кёп тилле эшитилген, тюрлю-тюрлю адет-тёреле жюрюген, алагъа хурмет да этилген арагъа эртте айланнганды.

Форум ана тиллени бла адабиятланы сакълаугъа бла айнытыугъа юлюшлерин къошаргъа итиннген хунерли эмда тири устазланы бирикдиргенди. Кенгешге Шимал-Кавказ федерал округну битеу субъектлеринден келечиле къатышхандыла.

Аны кезиуюнде пленар жыйылыула ётгендиле, «Ана тилни бла адабиятны бек иги устазы» деген конкурсда хорлагъанла бла интерактив сессияла, мастер-классла да бардырылгъандыла. Жаш устазла окъутууну шёндюгю амалларын сюзгендиле, сынауларындан юлгюле келтиргендиле, бирге билим бериу проектле да жарашдыргъандыла.

Жаш устазланы кенгешлерин Россейни халкъларыны ана тиллерини федерал институту къурагъанды, деп билдириледи КъМР-ни Башчысыны телеграм-каналында.