Сынауланы болжаллары тохташдырылгъандыла

Онбиринчи  эмда тогъузунчу классланы бошарыкъла 2026 жылда берлик ЕГЭ-лени эмда ОГЭ-лени болжалгъа дери, мурдорлу эмда къошакъ урумларыны бардырыллыкъ кюнлери белгиленнгендиле.  Алай бла Бир къырал сынауланы болжалгъа дери кезиую 20 мартдан 20 апрельге дери боллукъду. Мурдорлу урумуна уа сабийле 1 июньдан 9 июльгъа дери къатышырыкъдыла. Къошакъ кезиу а сентябрьни 4-ден башлап, 25-не дери бардырыллыкъды.

Тогъузунчу классланы бошарыкъла да ОГЭ-лени юч кезиуню ичинде берирге боллукъдула: болжалгъа дери  (21 апрельден 18 майгъа дери), мурдорлу (2 июньдан 6 июльгъа дери) эмда къошакъ (сентябрьни 3-ден 25-сине дери).

Бир къырал сынауланы мурдорлу кезиуюню башланыр кюню Россейни Жарыкъландырыу министерствосуну  буйругъуну излемлерине тийишлиликде тохташдырылгъанды. Анда белгиленнгеннге кёре, 2025-2026 окъуу жыл 26 майда бошалгъаннга саналлыкъды.

ЕГЭ-леде 2026 эмда 2027 окъуу жыллада абитуриентле алыргъа боллукъ эм аз балла бла байламлы бир-бир дерследен тюрлениуле тохташдырылыргъа болургъа боллукъдула. РФ-ни Жарыкъландырыу министерствосу аланы алты дерсден кётюрюуню тюз кёреди. Алай бла тарыхдан эм аз эсеп  36 угъай, 40 балл болургъа керекди. Физикадан а эм аз кёрюмдю 39-дан 41-ге дери кётюрюллюкдю.

Химиядан бла биологиядан да, билгенибизча, эм аз балла 39 эдиле. Энди уа ала да 40-гъа жетерге тийишлидиле. Информатикадан да ол эки баллгъа кётюрюллюкдю – 44-ден 46-гъа дери. Эм кёп балл а эсепледе тыш къыраллы тилледен къошулгъанды. Эм аз кёрюмдю алгъын 30 балл болгъан эсе, энди  ол 40-гъа жетерикди.

РФ-ни Жарыкъландырыу  министерствосу ангылатханнга кёре, быллай тюрлениуле окъутууну игилендирир мурат бла этиледиле. Министерство тохташдыргъан эм аз балла бла байламлы тюрлениуле аны бойсунууунда болгъан бийик окъуу юйлеге кирир ючюндюле. Ала уа къыралны вузларыны асламысыдыла.

Саулукъ сакълау, Маданият, Транспорт, Эл мюлк, Къоруулау эмда бирси министерстволаны бойсунууларында  болгъан окъуу юйле Бир къырал сынаулада алыргъа боллукъ эм аз эсеплени кеслери тохташдырыргъа эркиндиле. Алай эсе да, ала Рособрнадзор белгилеген балладан аз болургъа керек тюйюлдюле.