«Жарсыулагъа тынгыларгъа, болушургъа да хазырбыз»

Кёп болмай Республикагъа оноу этиу арада бардырылгъан тюзюнлей эфирге КъМР-ни къурулуш эмда жашау журт-коммунал мюлк министрини къуллугъун толтургъан Андрей Журавлёв къатышханды. Ол тынгылаучуланы эм ведомствону келечисини сорууларына жууапла бергенди, бёлюмде бардырылгъан ишлени, ол санда социал магъаналы объектлени, къурулушларыны, аланы болжалларыны, келир заманнга умутланы юслеринден да айтханды. 

Андрей Иванович, быйыл хайырланыргъа берилген уллу объектлени юслеринден айта, алты школ, Нальчикде сменагъа беш жюз адамгъа къараргъа жарагъан поликлиника эм  Буз къала хайырланыргъа берилгенлерин билдиргенди. 

Республика «Юйюр» миллет проектге да тири къатышырыгъын да,  аны бла байламлы Кёнделенде, Басханда эм Эски Черекде да биришер сабий сад ишленириклерин да къошханды. 

Ол айтханыча,  Басхан районда бла Басхан шахарда жашагъан  170 минг адамны ичер суу бла жалчытырча мадар этиле турады. Андан сора да, КъМР-ни Башчысы  Казбек Коковну буйругъу бла Нальчикде таза суу сакъланнган баш кёлню жангыртыу ишле башланнганларын айтханды. Проектге кёре  анга  2 миллиард сом къоратыллыкъды. 

Тюбешиуде адамланы тозурагъан эм жашау этерге жарамагъан юйледен башхаларына кёчюрюу программагъа аслам эс бурулгъанды. Андрей Журавлёв Къабарты-Малкъар бу жаны бла къыралны алчы регионларыны санында болгъанын белгилегенди. Сёз ючюн, 2017-2022 жыллада жашау этерге жарамагъан юйледен адамланы болжалдан алгъа кёчюрюрге къолдан келгенди. 

Кёп болмай программаны жангыртыргъа онг табылгъаны себепли  энди жараусуз юйледе жашагъанладан  2022 - 2025 жыллада эсепге тургъанланы да кёчюрюрге жарарыкъды. Аны бла байламлы Нальчикде кёп фатарлы юй ишлене турады, Басханда да аллай бирини къурулушу башланнганды. 

Ведомствону таматасы тийишли программа ишлегенли  республикада 800-ден артыкъ тийре игилендирилгенин да эсге салгъанды. Аладан 230-су жамауат тири хайырланнган объектледиле, башхалары уа кёп фатарлы юйлени арбазлары.

Аны бла бирге быйыл энтта да 39 тийре тапландырыллыкъды. Бюгюнлюкде аланы  34-де ишле бошалгъандыла. Планнга кёре, келир жылда да 35 жер жангыртыллыкъды. 

Студияны къонагъы  Нальчик шахар, Май, Чегем районла битеуроссей конкурсда тийрелерин тапландырыу жаны бла проектлерин жетишимли къоруулагъанларын да билдиргенди. Саулай алып айтханда, ол жумушлагъа 500 миллион сомдан артыкъ бёлюнюрюкдю.  

Бериуню ахырында Андрей Иванович ведомство не заманда да республиканы инсанларына ачыкъ болгъанын, ол кеси да  жарсыуларына тынгыларгъа, къолундан келгенича, болушургъа хазырлыгъын да чертгенди.