Уллу Хорламгъа аталгъан суратла – миллетни тарыхы

Андрей Ткаченко атлы суратлау искусстволаны музейинде Уллу Хорламны 80-жыллыгъына аталгъан «Кавказ. Келлик заманны кесине тартыуу» деген кёрмюч ачылгъанды. Анга Кавказны кёп суратчылары къатышхандыла, Художестволаны россейли академиясы (РАХ) эм Россейни суратчыларыны бизни республикада регионлу бёлюмю къурагъандыла. 

Тёртюнчю кере жыйылгъандыла битеу да Кавказдан суратчыла, алагъа ара шахарладан да къошулгъандыла. Нальчик суратчылагъа тюбешиулени шахары болгъанды.  РАХ-ны академиги Константин Петров Нальчикде суратлау искусство къалай айныгъаны сюзюллюгюн чертгенди. Таматала биринчи атламларын эте тургъанлагъа кеслерини сынау жолларыны юсюнден айтырыкъдыла. Графика, скульптура, живопись – битеу жанрлада да бардыла чыгъармала. Энчи Суриков атлы академияны бошагъан суратчы Аналаны Муратны «Эски жарала» деген ишин белгилерге боллукъду . Анда жашы тобукъланып, тазгъа суу къуюп, атасыны аякъларын жууа турады. Жашны халаллыгъы, жууашлыгъы, атасыны къыйын жолуна хурмети, анга болушургъа кюрешгени баямдыла. Алай эски уруш жарала сау болмайдыла, башлары жабылсала да. Ала солдатланы жюреклеринде да къаладыла. 

Мурат, жаш суратчы болса да, аты белгилиди, Москвада энчи кёрмючю да болгъанды. Уллу Хорламгъа аталгъан кёрмючде аны сураты энчи жерни алгъанды. Къараучула аны къатындан кеталмай эдиле, жилягъанла да болгъандыла. 

Москвадан, Санкт-Петербургдан, Владикавказдан, Майкопдан, Пятигорскдан, Кисловодскдан эм башха шахарладан суратчыла бу кёрмючге деп жюз бла алтмыш эки чыгъарма жиберген эдиле. Аладан алтмыш экисин сайлагъандыла. 

РАХ-ны академиги Сергей Ступин быйылдан башлап бу жыл сайын эришиу халда бардырылгъан кёрмюч жашаудан кетген суратчы Зураб Церетелини атын жюрютюрюгюн билдиргенди. 

Россейни халкъ суратчысы Герман Паштовну мастерскоюнда белгили суратчыла мастер-классла бергендиле. 

РАХ-ны академиги Руслан Цримов экинчи жыл кёрмючню темасы мифле бла байламлы боллугъун айтханды. Кавказны нарт эпосу суратлау искусствода битеу дуниягъа да сейир боллукъду. 
Кёрмюч онжетинчи ноябрьге дери барлыкъды.