Тёгерек-башны тазалагъандыла, терекле да орнатхандыла

Озгъан солуу кюнледе КъМР-ни табийгъат байлыкъла эмда экология министри Шауаланы Илиясны башчылыгъы бла «Таза къудурет» миллет проектни чеклеринде «Агъачны сакълайыкъ» эм «Россейни сууу» деген  акцияла бардырылгъандыла.  Бу жол  анга мингнге жууукъ адам къатышханды. Аланы кючлери   бла Нальчикде ара солуу паркда бла Хасанияда танг кесек терек орнатылгъанды, деп билдириледи КъМР-ни Табийгъат байлыкъла эмда экология министерствосуну пресс-службасындан. 

- Быллай акцияны магъанасы, табийгъатха болушхандан тышында, жамауатны, бютюнда ёсе келген тёлюню, табийгъатха аяулу кёзден къараргъа юйретиргеди. Кесигиз кёргенден, бу жол иги кесек сабий эм жаш адамла да  келгендиле.

Ала кеслери къоллары бла терек орнатсала,  аны иги ёсерине да къайгъырадыла. Ол себепден адамгъа ишни юсюнде юлгю кёргюзтгенден игиси жокъду. Адам терекни неда башха битимни ёсдюрюрге къаллай къыйын салыннганын сезсе, анга башха кёзден къарамай амалы жокъду,- дегенди Шауаланы Илияс.  

Ация жыл сайын бардырылгъан  ахшы тёреге саналады. Бир-бирле анга юйюрлери бла окъуна  къатышадыла. Бу жол Монополиялагъа къажау федерал службаны регионда Управлениясыны таматасы  Анна Кумахова да жашы бла бирге келгенди. 

- Биз быллай ишлеге терк-терк къатышабыз. Жомакълы табийгъаты болгъан республикагъа агъачын  байыкъландырыу бютюн магъаналыды. Мындан арысында да жерлешлерибиз, къонакъла да тамаша  жерлерибизден зауукълукъ табаргъа керекдиле,- дейди Анна Валентиновна. 

Байсыланы Темиржан билдиргенича,  патриотлукъ – адамны сезиминде болгъан затды. Ата журтун сюйген кир-кипчик жыяргъа, терекле орнатыргъа неда  аскерчилеге болушургъа да хазыр боллукъду. 

Ол кюн ара солуу паркда 300 чакълы къоз терек орнатылгъанды. Специалистле айтханнга кёре, ала 5-6 жылдан тирлик берип башларыкъдыла. Аны хайыры бла  эрленле, къанатлыла да ачлай  къаллыкъ тюйюлдюле эм паркны къонакълары да жубанырыкъдыла.  

Ахырында Нальчик сууну жагъаларын тазалагъанла  эм терекле орнатханла чай  эмда татлы ашарыкъла бла сыйланнгандыла. 

Эсге сала айтсакъ, арт жыллада Къабарты-Малкъарда экология акциялагъа къатышханланы саны ёсе барады. Миллет экология тизмеде регионубузну  экинчи жерге тийишли болгъаны анга шагъатлыкъ этеди.