Акъылманны эсгере

Геуюрге кюн республиканы шахарларында, эллеринде белгили къабартылы назмучу Алий Асхадович Шогенцуков туугъанлы 125 жыл болгъанына аталып тюрлю-тюрлю жумушла этгендиле.

Ол санда Нальчикде  Къулийланы Къайсынны атын жюрютген орамдагъы библиотекада  жыйылыу болгъанды. Аны библиотеканы таматасы Амина Бажева бла  биргесине ишлегенле  къурагъандыла. Анда Кюн шахарны устазлары бла окъуучулары, къауум жазыучула бла тюбешгендиле. Аланы араларында Алий Асхадовични туудугъу филология илмуланы доктору  Мадина Хакуашева, журналист, жазыучу Османланы Хыйса, назмучула Лариса Кудаева, Сарбашланы Азнор, Руслан Аталиков болгъандыла. 

Жыйылыуну Амина Бажева ачханды эм бардыргъанды. Чынг аллын ол ары келген окъуучуланы жазыучула бла шагъырей этгенди. «Биз бюгюн бери къабарты поэзияны мурдорун салгъан, жарыкъландырыучу, устаз, сейир да къадары болгъан адамны эсгере  жыйылгъанбыз. Аны жашауу къысха эди, алай ол жарыкъ жулдузгъа ушагъанды. Анда билимге  итиниулюк, ана тилни къадарына жарсыу, устазлыкъ, жазыучулукъ иш эмда Ата журту ючюн къазауатда жан бериую. Бюгюн биз Алийни жашау, чыгъармачылыкъ жолларыны юслеринден айтырыкъбыз. Сабийле уа аны назмуларын  окъурукъдула. Башлагъан а  аны туугъан эли  Кучмазукинодан этерикбиз,-дегенди ол.

Амина поэтни жашау жолуну юсюнден айтхандан сора Кюн шахарны окъуучулары Семёнова Виктория, Тленкопачева Алана, Долженко Юрий, Сижажева Лаура, Одижева София, Юшта София, Унежева Диана Алийни назмуларын  кёлден айтхандыла.

Аладан сора кезиу назмучулагъа жетеди. Алгъа Мадина Хакуашева сёлешеди. Ол  аппасыны юйюнде жашаууну юсюнден айтады. «Къайгъырыулу адам эди. Бютюнда  сабийлерине бек эс бургъанды. Аладан бири  ауруса, сау болгъунчу,  къатларындан кетмегенди. Кече окъуна  кёзюне  жукъу кирмегенди», - дегенди Мадина.

Хар миллетни да барды белгили адамлары. Халкъларыны алларында баргъанла. Алий Асхадович да къабартылы халкъны ахшы уланларындан бириди.  Миллет жашагъаны  къадар, аны аты  айтылгъанлай турлукъду, назмулары, башха чыгъармалары дайым эсде турурла, - дегенди Османланы Хыйса.

Аны бла Сарбашланы Азнор, Лариса Кудаева, Руслан Аталиков  кеслери жазгъан назмуларын окъудула. Ары келгенле узакъгъа созулгъан  къарсла бла назмучулагъа ыразылыкъларын билдирдиле.

Андан сора къабарты адабиятны мурдорун салгъан Али Шогенцуковха аталгъан жыйылыу бошалды. Ары келгенле уллу зауукълукъ алып кетдиле.