Жерлешлерибиз узакъ ёмюрлю болурча

1 ноября, 2025 - 09:45

Къабарты-Малкъарда саулукъ сакълау бёлюмню айнытыугъа аслам эс бурулады. Аны  себепли   2030 жылгъа  жерлешлерибизни  асламысы    82 жылгъа дери  жашарча мадар этилир деп уллу ышаныулукъ барды.

Эсге сала айтсакъ, былтыр республикада  бу жаны бла кёрюмдю  77 жылдан атлагъанды. Ол саулай къыралда окъуна ахшы жетишимди.  

Бюгюнлюкде республикада иги  социал-экономика болумну хайырындан демография бла байламлы иги кёрюмдю эсленеди.  Ол санда къагъанакъланы саны да кёбейгенди -  буруннгу жыл бла тенглешдиргенде,  былтыр 1,8 процентге.

Саулукъ сакълауну айнытыу жаны бла мадарланы  юслеринден айтханда, быйыл   республикада сегиз  амбулатория ишленнгенди эм он  поликлиникагъа тынгылы ремонт этилгенди. Аны бла бирге  Республикалы клиника  больницаны мурдорунда суткагъа жюз адамгъа къарарча терк болушлукъ берген службаны бёлюмю ачылгъанды.

Андан сора да,  Нальчикде  250 саусузгъа  онкодиспансерни къурулушу да барады.  Проектге кёре ол  келир жылдан кеч къалмай хайырланыргъа берилирге керекди.

Магометланы Сулейман.
  • 12 просмотров
Поделиться: