Дерсле бардырылып тебирегендиле

Нальчикде 2-чи номерли лицейни тынгылы жангыртылгъан бёлюмюнде энди  дерсле бардырылып тебирегендиле. Мекям 1937 жылда окъуна ишленнген эди. Озгъан ёмюрню 90-чы жылларындан бери уа мында тынгылы ремонт бу жол биринчи кере этилгенди. Бюгюнлюкде мында бешинчиден  башлап сегизинчи класслагъа дери жюрюгенлени саны  1225 адамды.

Ремонтну кезиуюнде мекямны чардагъы, поллары, терезелери бла эшиклери, суу, ток эмда жылыу баргъан ызлары алышындырылгъандыла. Андан сора да, видеокъараула система орнатылгъанды эмда  къалауурла тургъан жер да тапландырылгъанды.

Саулай да 38 окъуу кабинет, коридор, спорт зал, ашхана да жангыртылгъандыла. Энди мында физикадан  бла химиядан  лабораториялы эмда практикалы ишлени бардырыргъа жараулу шёндюгюлю оборудование бла жалчытылыннган энчи классла да болгъанларын белгилерчады. Андан тышында уа, классланы барысына да интерактив къангала орнатылгъандыла.