Республиканы аты иги бла айтылгъанды

Москвада  «Миллет саулукъ сакълау -2025»  конгресс  бардырылгъанды. Анда РФ-ни саулукъ сакълау министрини орунбасары  Виктор Фисенко «Узакъ ёмюр эм тири жашау» миллет проектге кирген «Саулукъ сакълауну биринчи болушлукъ берген бёлюмюн  игилендириу» регион программагъа кёре, Къабарты-Малкъар биринчи медицина болушлукъ берген   медицина объектлени жангыртыу бла  бирсиледен айырмалы болгъанын белгилегенди, деп билдириледи КъМР-ни Саулукъ сакълау министерствосуну пресс-службасындан.

Бюгюнлюкде регионда  Акъ-Суу, Кенже, Куба-Таба, Светловодское, Красносельское, Дейское, Эски  эм Тёбен Черек элледе биришер амбулатория ишленнгенди.  Ала ишлерин  жангы излемлеге келишген  «аяулу поликлиника» амал бла бардырадыла.  Аны баш магъанасы – адамлагъа тап онгла къураргъа. Сёз ючюн, специалистлени къыйналмай табарча, жукъгъан ауруулары бла инсанла башхалагъа къатышмазча, кёп сакъларгъа тюшмезча эм башха мадарла да этилгендиле.

Эсге сала айтсакъ, «Миллет саулукъ сакълау - 2025» конгрессни РФ-ни Саулукъ сакълау министерствосу  къурагъанды. Анга власть органланы келечилери, врачла, алимле, экспертле да къатышадыла. Аны баш магъанасы - къыралда саулукъ сакълауну айнытыуну къыйматлы амалла табаргъа.

Форумда  миллет проектле, медицина болушлукъну жангыртыу, жюрек,  къан тамыр эм онкология  ауруулагъа къажау туруу, цифралы амалланы сингдириу, ананы  бла сабийни сакълау, кадрла бла жалчытыу эм жамауатны ыразы этерча амалланы хайырланыу дегенча амалла соруу сюзюледи.