Шимал-Кавказ парламент ассоциацияны XII конференциясы ишин башлагъанды

КъМР-ни Парламентини депутатлары, законла чыгъарыучу органны башчысы Татьяна Егорованы таматалыгъында, Шимал-Кавказ парламент ассоциацияны XII конференциясына къатышадыла. Ол ишин бюгюн Къарачай-Черкесде башлагъанды. 

 Ассоциацияны болумуна тийишлиликде, анга башчылыкъны хар жыл да бир регион этеди, бу жол парламентарийлени къонакъгъа Къарачай-Черкес Республика алады.

КъМР-ни къауумуна Билим бериу, илму, физический культура, спорт, жаш тёлюню ишлери жаны бла комитетни башчысы Нина Емузова, Промышленность, транспорт, связь эм жол мюлк комитетни башчысыны орунбасары Байдаланы Салих, Урунуу, социал политика, саулукъ сакълау эм ветеранланы ишлери жаны бла комитетни башчысыны экинчиси Владимир Безгодько да киредиле.

Конференцияны программасы байды. Депутатла федерал законланы проектлерине къарарыкъдыла. Аланы арасында бизни парламентарийле хазырлагъан законопроектлеге да бардыла: «Ёксюз эм къарар адамлары болмагъан сабийлеге социал себепликни къошакъ гарантияларыны юсюнден» Федерал законнга тюзетиуле, «Акъылбалыкъ болмагъанла этген бузукълукъланы, сабийле орамлада кеслери алларына айланнганны профилактикасыны системасыны юсюнден» Федерал законну 14-чю эм 18-чи статьяларына тюзетиуле  эмда «РФ-де пассажирлени бла жюклени автомобиль эмда ток бла ишлеген транспорт бла жюрютюуню къурауну эмда РФ-ни бир-бир законодательный актларына тюрлениуле кийириуню юсюнден» Федерал законну 3-чю эм 16-чы статьяларына тюзетиуле.

Депутатла битеу сорууланы сюзгенден сора законодательный башламчылыкъланы  РФ-ни Къырал Думасына ашырыу жаны бла оноула чыгъарлыкъдыла.

Шимал-Кавказ парламент ассоциация СКФО-ну регионларында законла чыгъарыучу органланы бирикдиреди. Ол праволу къыралны, демократияны, россейли парламентаризмни айнытыр, политика, экономика, социал жаны бла реформаланы келишип бардыдыр, парламентлени араларында байламлыкъланы жалчытыр мурат бла къуралгъанды.