Тиширыуланы башламчылыкъларына – энчи эс

«Единая Россия» партияны халкъ программасын къурагъанда тиширыуланы башламчылыкъларын сюзер мурат бла «Тиширыула келир заманны къурайдыла» ючюнчю битеуроссей форум  бардырылгъанды.   

«Россей» миллет арада 700-ден аслам адам жыйылгъанды. Аланы арасында регионлада партияны жамауат советлерини башчылары, къыралны 89 регионунда  партия проектлени жашауда бардырыугъа жууаплыла, жамауат биригиулени келечилери, экспертле.

Форумда тиширыуланы къыралны айнытыуда миллет  борчланы, социал, политика, жамауат жумушланы тамамлаугъа къошууну соруулары сюзюлгендиле.  Сёз тиширыуланы жамауат жашауда башламчылыкъларына тутхучлукъну, профессионал сынауларын айнытыуну, аналыкъны бла жамауат жашауда тириликни бирге хайырлы келишдириуню, аланы  илмугъа, бийик технологиялы сфералагъа, законла жарашдырыугъа, бизнесге кийириуню онгларыны юсюнден да баргъанды.

Партияны башчысы Дмитрий Медведев «Единая Россияны» тиширыуларыны башламчылыкълары халкъ программагъа кийирилгенлерин белгилегенди. 

 - Сиз халкъ программаны чеклеринде къаллай магъаналы жумушла толтурулгъанларын жамауатха билдирирге керексиз. Алай бла биз келир заманнга кесибизге жол ачабыз,-дегенди партияны оноучусу.

Ол тиширыуланы жыйылыуларында, ала уа «Единая Россияны тиширыуларыны биригиулерин» къурайдыла, къыралны жашауунда эм магъаналы соруула сюзюлгенлерин да айтханды, ол санда саулукъ сакълау, аналыкъ, сабийлик, предпринимательство эм башхала. Дагъыда фронтха болушлукъгъа, аскерчилени юйюрлерине себепликге да энчи эс бурулады.

- Бу иш баш магъаналыды партиягъа, бюгюн аны бла битеу къырал кюрешгенин кёребиз.  Аскерчилени аналары, юй бийчелери, къызлары, эгечлери жууукъ адамлары ючюн бирге къайгъырыргъа онг табадыла,-дегенди партияны оноучусу.

 Дмитрий Медведев  «Единая Россияны тиширыуларыны биригиуюне» партияны жангы халкъ программасын къураугъа къатышыргъа буюргъанды. Ол тиширыула этген  башламчылыкълагъа эс бурургъа кереклисин да айтханды.

- Форум билимибизни, сынауубузну, оюмларыбызны ачыкъ этерге, кемчиликлени сюзерге, артыкъда магъаналы жумушланы белгилерге онг береди. Бюгюнлюкде уа барыбызны да муратыбыз бирди – Хорлам,-дегенди ол

Партияны генсоветини башчысы Владимир Якушев 2026 жылда магъаналы ишле толтурургъа тюшеригин белгилегенди, ол санда къол кётюрюуню кюнюне хазырланыргъа, халкъ  программаны жарашдырыргъа.  «Биз башламчылыкъланы жыйышдырыргъа, аланы сынаргъа керекбиз. Биз айырыулада кёргюзтюрюк документ адамланы излемлерин, къайгъыларын ачыкъларгъа, ангылашыныулу болургъа керекди»,-дегенди ол.

 Владимир Якушев партияны тири  тиширыуларына ышаныулукъ уллу болгъанын да айтханды. «Сизни оюмларыгъыз, тирилигиз къырал даражада керекди. Сиз битеу сфералада ишлейсиз, болумну ичинден билесиз.   «Единая Россияны тиширыуларыны биригиую» башламчылыкълагъа тутхучлукъ этилген жер болургъа керекди»,-дегенди ол.

 Форумда «Насийхатчылыкъ», «Юйюрню саулугъу», «Хорламдан сора жашау», «Тиширыуланы биригиулери» эм «Тиширыу политика» бёлюмледе тамамларгъа белгиленнген жумушла да сюзюлгендиле.

 КъМР-ни Къырал Думасыны депутаты Виктория Родина форумну юсюнден    кесини оюмун билдиргенди:

- Къыралны битеу субъектлеринден мингнге жууукъ адам жыйылып, регионлада болгъан эм хайырлы сынауланы кёргюзтедиле. Программа беш секциягъа юлешинип бардырылгъанды, мен акъыл этгенден,  алада артыкъда магъаналы соруула  сюзюлгендиле: тиширыуланы политикада жерлерини, насийхатчылыкъны, энчи аскер операциягъа бла аскерчилени юйюрлерине себепликни, юйюрню эм тиширыуланы саулукъларыны юслеринден.

  Экинчи кюн да бай болгъанды. Пленар жыйылыуда мындан ары тамамланыллыкъ жумушла белгиленнгендиле, - деп басмалагъанды аны сёзлерин KABARDIN-BALKAR.ER.RU сайт.