Эсепле чыгъаргъандыла, борчла салгъандыла

Алгъаракълада Нальчикни 33-чю номерли орта школунда  Сабийлени бла жаш тёлюню «Биринчилени атламлары» битеуроссей биригиулерини  биринчи бёлюмлерини  таматаларыны стратегия  сессиялары болгъанды.

Билдирилгенича, сентябрьде ётген айырыуланы эсеплерине кёре, «Биринчилени» биринчи бёлюмлерини таматаларыны къаууму иги да жангыртылгъанды.

-Бу къымылдауну мурдорун  аны биринчи бёлюмлери тутадыла. Алагъа не  гитче затха да уллу кёллюлюк этмеген, тири жашла бла къызла башчылыкъ этедиле. Болсада алагъа кеслерича тири абаданла насийхатчылыкъ этерге керекдиле:  устазла,  юйретиучюле,- дегенди «Биринчилени атламлары» биригиуню  регион бёлюмюню Аслан Шипшев, сессияны ача.

Андан сора  ол республиканы кёп районларындан, шахарларындан, эллеринден биринчи организацияланы башчылары, келечилери келгенлери ючюн  ыспас этгенди. «Не ишни къолгъа алсагъыз  да, аны  кёл салып  тамамлайсыз, ёсюп келген тёлюге юлгюсюз. Бюгюн  мында айтылгъанны да жашагъан жерлеригизде тенглеригизге айтып ангылатыргъа сизге тюшерикди. Аны бла бирге уа ол неда башха ишде хар адамгъа да тынгылап, оюмун да билирге керекси з»,- деп чертгенди Аслан Шипшев.

Ол айтханыча, «Биринчилени»  тюрлю-тюрлю проектлери бардыла. Ала бла байламлы мындан ары конкурсла да  къураллыкъдыла. Аланы юслеринден  басмада, радио, телевидение бла да   билдирилгенлей турлукъду. «Алагъа  тири къатышыгъыз, бир затдан да къоркъмагъыз, алгъа таукел барыгъыз»,-деп бошагъанды ол сёзюн.

«Биринчилени»  регион  бёлюмюню  тамата вожатыйи Камилла  Калажокова уа биригиуню борчлары болгъаныны, ала не зат бла кюрешириклерини юсюнден билдириуню  да этгенди эмда биринчи организацияланы биринчи тюбешиулери  керти да хайырлы боллугъуна ышаннганын билдиргенди. Ызы бла ол, республикада  268 школ болгъанын, алагъа барып,  биринчи организацияла къалай ишлегенлерине къарарыкъларын да  эсгертгенди.

Андан сора сабийле, къауум-къауумлагъа юлешинип, аудиториялагъа  кетгендиле. Алада  къалай ишлеселе тап боллугъуну эмда тизгинлерине не къадар кёп жаш адамны  къошарча не этерге кереклисини юсюнден да сёз баргъанды.

Аудиториялада сёлешиуледен сора, биринчиле биягъы залгъа къайтхандыла, анда  соруула, жууапла да башланнгандыла. Эм иги соруу эмда жууап бергенле саугъала къоллу болгъандыла.

Аслан Шипшев ол кюн  бардырылгъан иш керти да хайырлы болгъанына, тюбешиуню кезиуюнде  айтылгъан башламчылыкъла эмда предложенияла битеу биринчи оргиназациялагъа бютюн хайырлы боллукъларына  ышаннганын билдиргенди.

-Кёп жаш адамланы оюмларына бек сюйюп, къулакъ салып  тынгылагъанма, эшитгенме. Жашланы бла къызланы хазна къалмай  барысы да эллеринде, шахарларында, республикаларында эмда Ата журтда  биринчи организациялагъа киргенле  хайыр келтирирге сюйгенлерин ангылагъанма. Аланы араларында уа 16-чы номерли  школдан Холаланы Далхатны, Псыкоддан Роза Хамгокованы, Быллымдан Жазаланы Хадиджаны,  Ташлы -Таладан Алтууланы Радиманы, Эски Черекден Тамерлан Тлегуровну, дагъыда башхаланы  атларын энчи белгилерге  тийишлиди.

«Биринчиле»  тизгинлерибизни бютюн аслам, бютюн къаты этерден артха турмайдыла эмда тенглерин бирге бардырылгъан жангы ишлеге  кёллендирирге  хазырлыкъларына ишек жокъду»,-дегенди ахырында  Аслан Шипшев.