Ол да жашаргъа сюе эди

Ата журт ючюн жан бергенле. Сау-саламат юйлеринден кетип, тауушсуз, хапарсыз, чуусуз думп болуп къалгъанла. Сизни хар кюн сайын сакълап турдула атала, анала, эгечле, къарындашла, сабийле. Кёп сакъладыла  кече-кюн да. Жашдан къарт болдула. Хар тауушха элгене, сизни келе тургъан сунуп, аллыгъызгъа къарай, жашауларын ётдюрдюле.

Къайтмадыгъыз, сау болмазлыкъ жара сала сизни таныгъанлагъа. Уруш аулакълада къалдыгъыз. Душман аллына къалкъан болуп сюеле.

Курск шахарны тийресинде урушну бек уллу сермешлеринден бири бара эди. Гитлерчиле,  не да этип, уллу къоранчлагъа да къарамай, ол тийрелени иелерге кюрешедиле. Андан а ара шахарыбыз Москвагъа узакъ тюйюлдю.

Эки жанындан да топ-окъ атылгъан тауушла адамланы сангырау этедиле. Бир кезиуде ол тийрени шошлукъ басады. Сора бираздан окопдан окопха, аууздан ауузгъа, солдатдан солдатха «тигрле», «тигрле келедиле» деген сёзле эшитиле башлайдыла. Аскерчиле башларын  бу танкла таба  кётюрюп   къарайдыла.

Уллу душманны бек ышаныулу саууту болгъандыла. Темири алай къалын кючлю болгъанды, аны хар топну огъу тешалмагъанды. Ала бизни аскерлеге кёп халеклик салгъандыла.

Бир заманда болгъанны титиретип, гюрюлдетип, тёгерек-башны къалтыратып, букъу этдирип,  окопланы биринчи тизгинлерине ол къурч машинала чыкъдыла. Кёп да тюйюл эдиле, битеу да юч. Кенглигине тизилип келедиле. Эки жанындагъыла артдаракъда, ортадагъы уа, топ атхан быргъысын да ёрге буруп, бирсиледен алгъаракъда.

Бизни топчула аланы жууугъуракъ келликлерин сакълайдыла. Жаланда бир атханлай урургъа керекди. Кесин да эм къарыусуз жерине. Экинчи марап атаргъа заман, онг да боллукъ тюйюлдю.

Танкла уа окопланы биринчи тизгинлерине жууукълашхандыла. Бютюнда бек ортадагъы. Бизни окоплада алгъаракъда бир топ болады. Юсюне да чырпыла атып, тышындан къарагъан кёрмезча, букъдурулуп. Алдагъы былагъа жууукъ келеди, бир кезиуде быгъынын была таба бурады. Ол такъыйкъада топчула аны марап атадыла. Биринчи окъ аны къарыусуз жерине тиеди эм олсагъатлай тютюн кёрюнеди.

Немислиле чартлап чыгъадыла. Алай узакъ кеталмайдыла. Бизни аскерчилени окъларындан алайда окъуна къапланадыла. Ол бирси экиси уа ызларына къачдыла.

Бизни топчула уа ёрге-ёрге секирип къууанадыла. Аладан бирлери барысындан да бийигирекди. Къачхан танкла таба жумдуругъун кёргюзтеди. Ол эди бир атханлай немислилени айтхылыкъ танкларын кюйдюрген. Огъары Малкъардан Герийланы Юсюпню уланы Къаражау. Урушну биринчи кюнлеринден окъуна кетген эди къазауатха. Анга ол заманда толу онсегиз жыл да болмагъан эди.

Танкны кюйдюрген жашны жигитлиги ючюн саугъалар къагъытларын хазырлап тебирейдиле. Эки офицер,  аны излей,  блиндажгъа киредиле. Алагъа ёрге къопхан заманда Къаражауну башы «отоуну» башына жете эди. Уллу санлы, бийик жаш болгъанды ол.

Бираздан а уллу атышыу башланды. Бек алгъа немис самолётла жетдиле. Бомбала атдыла. Ол тийрени тюз да къыяма айланнганча этдиле. Энди мында уа сау адам къалгъан болмаз деген чекге жетдиргенлеринден сора танкланы жибередиле.

Ала бла болгъанны малтап ётюп кетерик сундула. Алай совет аскерчиле къурчдан да къаты эдиле. Жанларын-къанларын аямай,  немис танкланы чачдыра, кюйдюре эдиле.

Андан сора да, Къаражау нёгерлери бла бир ненча танкны къара тютюнлерин бардырады. Алай быланы ахырлары кёрюнмейди. Нёгерлери да жоюлуп, Герий улу жангыз къалгъанда, къолуна гранат алып, танк тюбюне секирди. Ахыр солууу бла бирге дагъыда аладан бирин жокъ этди.

Ата журтларын къоруулай жан бергенлеча, ол да жашаргъа насыплы болургъа сюе эди. Алай къадар анга башха буйрукъ этди.