Ахыр кюнюне дери борчуна кертичи болгъанды

13 октябрь – Къуллукъларын толтура ёлтюрген  полициячыланы эсгериуню кюню

Гузиланы Билялны жашы Тахир гитчелигинден да право низамны сакълаучу органлада къуллукъ этерге сюйгенди. Ол  муратын толтургъанды, ол угъай, къуллугъунда уллу жетишимле да болдургъанды, полковник чыннга дери жетгенди. Алай, жарсыугъа, Тахир 2015 жылда аманлыкъчыланы къолундан жоюлгъанды.    

Гузи улу  ич ишле органлада 1993 жылда къуллукъ этип башлагъанды. Ол Къабарты-Малкъар къырал университетни тыш къыраллы тилле факультетини немис тил бёлюмюн бошагъанды, ызы бла   юридический факультетни дипломун да алгъанды.

Сабийлигинден ол спорт бла  кюрешгенди, биринчиден, эркин тутушууну сайлап, ызы бла уа   тутушууну восток тюрлюлерине  кёчген эди, карате-кёкусинкайдан Шимал Кавказны чемпиону  болгъанды.  

Къыралны  власть органларыны оноучуларыны къоркъуусузлукъларын сакъларгъа   хар кимни да чакъырмайдыла. Бу къуллукъ бютюнда эслиликни, тириликни, терк сагъыш эте, оноу чыгъара  билиуню  излейди. Тахирни, айырмалы офицернича, РФ-ни къоруулауну федерал службасына чакъырадыла. Ол РФ-ни субъектлерини башчыларын сакълагъан бёлюмде къуллукъ этгенди, Къабарты-Малкъарны биринчи президенти Валерий Коковну къоркъуусузлугъун сакълагъанды.   

  Тахир   ФСО-ну РФ-ни субъектлерини башчыларын сакълагъан офицер, ызы бла Къабарты-Малкъарда власть органланы объектлерини къоркъуусузлукъларын жалчытыу жаны  бла тамата инспектор болгъанды, бу къуллукъдан а аны Черек районда ич ишле органланы бёлюмюню таматасына саладыла. Сёзге, ол кезиуде  анга  30 жылдан энди атлагъан эдиле.

Тёрт жылны ичинде (2003-2007 жыллада) ол Элбрус районда полицияны бёлюмюне башчылыкъ этгенди.  Ызы бла КъМР-де МВД-ны штабыны баш инспекторуну орунбасарына салыннганды, жыл жарым да озгъунчу уа, Нальчикде полицияны экинчи бёлюмюню башчысына тийишли кёрюлгенди. 2015 жылны июль айына дери ол Черек районда ОМВД-ны штабыны таматасы болуп къуллукъ этгенди. Аны иш кёллюлюгюн, борчуна кертичилигин   министерствону оноучулары да кёрмей къоймагъандыла. Ол къуллукъ этиуде, право низамны сакълауда жетишимлери ючюн 12 кере белгиленнгенди.

2015 жылны июль айны кечелеринден биринде  орамдан эки аманлыкъчы аны юйюню терезелерине автоматладан атдырып, къачып къутулгъандыла. Тахир алгъан жарала асыры ауурдан, алайда ауушханды.  Полициячыла айтханларыча, бандитле мекямны, аны иесин иги таныгъаннга ушай эди. 

 Тахир ич ишле органлада 22 жыл ишлегенди. Ол ахыр кюнюне дери борчуна кертичи болгъанды.  

Тахирни юсюнден аны бла бир классда окъугъан, сабий саддан бери окъуна таныгъан Црайланы Альберт эсгереди. Жашау алай болады – нёгерлеринги хар кюнден   кёрюп   туралмайса, алай байламлыкъла уа тас болмайдыла. «Тахир бир тюрлю хыйласыз адам болгъанды,  не заманда да тюзлюкню сайлагъанды. Ишин бек сюйгенди. Биргесине къуллукъ этгенледен аны юсюнден бир аман сёзню, бир кёлкъалдыны эшитмегенме. Терслик этген болса да, аны тюз жолгъа салыргъа, алай оноучуланы аллында уа къорууларгъа кюрешгенди Тахир.  Аны жыл санында быллай уллу къуллукълада ишлеген, полковник чыннга жетген кёпле болмазла. Классыбыздан жашла, къызла болсунла, аны ызындан ариу болмаса, башха айтырыкъ тюйюлдюле», - дейди Альберт.

Гузиланы Тахирни школ нёгерлерини башламчылыгъы бла Нальчикни 17-чи школунда эсгериу къанга салыннганды.