Къоркъуусузлукъну жорукълары унутулмазча

Тюкенде сатылгъан, бютюнда юйде этилген консерваланы сюймеген хазна жокъду. Болсада  ала къоркъуулу аурууну - ботулизмни къозгъаргъа боллукъларына, баям, сагъыш этген аз болур. Ол  а нерва системаны бузгъан  къыйын аурууду, заманында врач къарап тинтмесе, адам ёлюрге окъуна боллукъду. 

Сынам кёргюзтгенича, онгсузланы  кёбюсю юйде этилген консерва ашап тюшедиле.  Аны баш сылтауларындан бирлери уа иги продуктланы  хайырланмагъанларынданды неда банканы бузулгъанына  эс бурмагъанларынданды. 
Ботулизмни  бактериясыны ууу белгили ууладан бирине саналады эм  жилянныкъындан  275 минг кереге аманды.  Ол иссиликге аламат чыдайды, 2-5 сагъатны ёлмей тёзерге болады.  Алай  сууну иги   къайнатса,  ёлмей къалмайды.   Ашарыкълагъа ол хауа иги жюрюмесе киреди. Консервалада жайылыргъа аны ючюн ёчдюле.

Аны заранлыгъы жаланда ашагъандан сора билинеди, ары дери ол кёзге кёрюнмейди, бир тюрлю ийис этмейди,  татыуу да жокъду. Бирде  банканы башы да кёпмезге боллукъду.

Ол себепден танымагъан, билмеген жеригизден консерва алыу къоркъуусуз тюйюлдю. Кимни къалай этгенин билмесегиз, тузланнган, къатдырылгъан   чабакъ да хатагъа келтирирге боллукъду. 
Консервала хазырлагъанда,  гриб, эт, чабакъ, быхы, чюгюндюр, гедигин  дегенча кёгетлени бла хансланы хайырланмазгъа кюрешигиз. Аланы  кирден тазаларгъа  бек къыйын болады.  Дагъыда бузулгъан эм къыйырлары  чириген кёгетлени да  хайырланмагъыз. 

Эм игиси халкъда  жюрюген амалланы бузмасады. Сёз ючюн, тузну, уксусну мардасындан   аз салмагъыз эм кёбюрек къайнатыргъа эринмегиз.
Башы кёпген, ичинде кёгетле къаралгъан банканы артталыда хайырланмагъыз.
Консерваланы жаланда жер тюбюнде неда холодильникде асыраргъа тийишлиди. 

Ашагъандан сора онгсуз болгъан эсегиз, созмай врачха билдиригиз эм букъдурмай сылтауун  айтыгъыз. Банканы да  атмай,  ичиндеги ашарыкъны къурамын  лабораторияда тинтирге берсе,   игиди. Ол шарт  тюз диагноз салыргъа эм жетишимли багъаргъа болушурукъду.