Жамауатны сайлаууна кёре

Бешжюз сомлукъ жангы къагъыт ахчагъа салынырыкъ белгиле ючюн онлайн-къол кётюрюу башланнганды. Банкнота Шимал Кавказ федерал округга бла аны ара шахарына - Пятигорскча аталгъанды. Къол кётюрюу «Россей» Миллет араны болушлугъу бла бардырылады, деп айтылады РФ-ни Ара Банкыны сайтында.

Хар чёп атыугъа къошулгъан адам эки белги сайларгъа керекди: бири беш жюз сомлукъну ал жанындады – анда Пятигорскну талай сейирлик жерлерин кёрлюксюз, ол санда Лермонтов эмда Академияла галереяланы, Бештау бла Машук тауланы, жилянны жулкъа тургъан къушну эсгертмесин эм башхаларын. Бирси жанында уа Шимал-Кавказ федерал округну регионларында жерле, мекямла, эсгертмеле эм объектледиле: Минги тау эмда Чегем чучхурла, Дербент къала, Домбай, Чиркей ГЭС, галереяла…

Аладан къайсыларын эм кёп адам сайласа да, Россейни Банкыны эмда Госзнакны сурат ишлеучюлери аланы бу къагъыт ахчаны жарашдырыуда хайырланырыкъдыла. Ахчаны ахыргъы сыфатын а Банкны башчыларыны Совети къабыл этерикди.

Жангыртыллыкъ 500 сомлукъ башха къагъыт ахчала бла бир тизгиннге турлукъду. Ала бары да бир тюрсге кёре жарашдырылгъандыла: хар банкнота энчи бир федерал округну сыфатын кёргюзтеди.

Бюгюнлюкде хайырланыуда жангыртылгъан 100 эм 5000 сомла бардыла. Быйылны ахырына дери Россейни Банкы 1000 сомлукъну сыфатын да тюрлендирликди.

Алай бла сизни да чёп атыугъа (https://cbr.ru/cash_circulation/simvoly-dlya-banknot) къатышыргъа чакъырабыз. Ол бу айны онтёртюсюнде кюндюз сагъат онекиде бошаллыкъды. Аны биринчи кюнюнде уа Минги тау бла Пятигорскда  къушну эсгертмеси алгъа чыкъгъандыла. Кеслерини оюмларын 75 мингден артыкъ инсан туура этгендиле.

Банкны башчысыны орунбасары Сергей Белов айтханнга кёре, чёп атыуну эсеплерин келир жылны экинчи жарымында туура этерге боллукъдула, жангыртылгъан ахчаны уа адамла 2027 жылдан алгъа кёрлюк тюйюлдюле. Шёндюгю 500 сомлукъла да ала бла бирге жюрюрюкдюле, алай аздан-аз бола барлыкъдыла.