Коммунал жумушланы тёлегенде кимлеге онг бериледи?

Жашау журтну эмда коммунал жумушланы багъаларын тёлегенде компенсация алыргъа кёпле тийишлидиле. Кимледиле ала эмда быллай болушлукъну къалай алыргъа боллугъуну юсюнден Къабарты-Малкъарда МФЦ-дан билдиргендиле.

Компенсацияны ма была алыргъа эркиндиле:

- Уллу Ата журт урушха къатышханла;

- Уллу Ата журт урушну эмда аскер сермешлени сакъатлары;

- аскер сермешлени ветеранлары;

- сакъатла;

- сакъат сабийлери болгъан юйюрле;

- Къабарты-Малкъар Республиканы законодательствосуна тийишлиликде кёп сабийли болгъаннга саналгъан юйюрле;

- аскерчиле эмда ич ишлени органларыны, от тюшюуге къажау къырал службаны, уголовный-толтуруучу системада учрежденияланы эмда органланы келечилери, аскерчи эмда ишчи къуллукъларын толтургъан кезиуледе жаралы неда контузия болуп огъесе ачып сакъат болгъанла;

- Экинчи дуния урушну кезиуюнде фашистле эмда аланы союзниклери къурагъан концлагерьледе, геттолада, тутмакъ маталлы башха жерледе кечиннген акъылбалыкъ болмагъанла;

- Уллу Ата журт урушха къатышханланы, анда сакъат болгъанланы, аскер сермешлени ветеранларыны (ала ёлген эселе) юйдегилери;

- аскер борчларын толтургъан кезиуде ёлген аскерчилени, ич ишлени органларыны, от тюшюуге къажау къырал службаны, уголовный-толтуруучу системада учрежденияланы эмда органланы, къырал къоркъуусузлукъ органланы келечилерини эмда аскерчилени юйдегилери;

- Чернобыль АЭС-де къыйын болумда радиацияны заранлыгъын сынагъан инсанла;

- Чернобыль АЭС-де къыйын болум салгъан хатаны кетериу ишлеге 1986-1987 жыллада къатышханла;

- Чернобыль АЭС-де къыйын болумдан сора аны тёгерегинде жашаргъа жарамагъан жерден 1986 жылда кёчюрюлгенле (ол санда кеслери кетгенле да);

- Чернобыль АЭС-де къыйын болум салгъан хатаны кетериу ишлеге 1986-1987 жыллада къатышып ауушханланы юйдегилери;

- «Маяк» производстволу биригиуде 1957 жылда авария болуп, Теча суугъа радиация къалгъан-къулгъанла тёгюлгенден сора аны заранлыгъын сынап ауруулу болгъан инсанла;

- СССР-ни Аскер Кючлерини, Къырал къоркъуусузлукъ комитетини аскерини эмда органларыны, ич аскерлени, темир жол аскерни эмда башха аскер къуралыуланы санында энчи къоркъуулугъа саналгъан бёлюмледен инсанла (ол санда сакъатла болгъанла) эмда аларын тас этген юйюрле;

- Семипалатинск полигонда ядерный сынаула бардырылгъанда радиацияны заранлыгъын сынап, 25 сЗв-ден (бэр) артыкъ доза радиация уу алгъанла;

- 2004 жылда 31 декабрьге урунууну, ол санда аскер къуллукъну, къырал граждан къуллукъну ветеранлары болгъанла, кеслери да пенсиягъа чыкъгъанла;

- реабилитация этилгенле эмда политика репрессияладан хата кёрюп, сакъат болгъанла неда пенсиягъа чыкъгъанла.

Компенсация алыр ючюн къагъытланы жыйып, «Мени документлерим» арагъа неда КъМР-ни Урунуу, иш бла жалчытыу эмда социал къоруулау арасына элтип берирге керекди.