Сабийле - ГЭС-де къонакъда

РусГидро компанияны Къабарты-Малкъарда бёлюмю «Кюн шахар» сабий чыгъармачылыкъ академияны окъуучуларыны къауумуна Басхан ГЭС-ге экскурсия къурагъанды. Бу ишни бардырыуну магъанасын ёсе келген тёлюге усталыкъ сайларгъа себеплик этиу, аланы гидроэнергетика бла шагъырейлендириу деген бла ангылатхандыла энергетикле.

Экскурсияны къонакълагъа бу станцияны тамата устасы Аслан Хацуков ётдюргенди. Объектни тёбен жанына чакъырып, ол окъуучуланы эмда ала бла бирге келген устазланы бизни къыралда эм эрттегили ГЭС-леден бирини тарыхы бла шагъырейлендиргенди, энчиликлерини юсюнден да хапарлагъанды.

Къонакъла уа юч гидроагрегатны чархлары бурула тургъан машинала орналгъан залгъа уллу сейир этип къарагъан эдиле. Станцияны келечиси сабийле ангыларча тилде ол бары да къалай ишлегенини юсюнден айтханды, бийикден саркъгъан сууну кючю ызындан электрокюч къалай болгъанын да билдиргенди. Гитче къауум дагъыда техникагъа, ара пультха да кёз жетдиргендиле, ахырында уа станцияда чыгъарылгъан электрокючню сетьлеге жиберген устройствогъа къарагъандыла.

«Бизни ишибизге сейирлери болгъан сабийле бла тюбеширге не заманда да хазырбыз, - дегенди Аслан Хацуков. – Ёсе келген тёлю юйлерибизни эмда шахарларыбызны жарытхан энергия къайдан чыкъгъанын билгени бек магъаналыды. Бюгюн ётген экскурсия уа алада илмугъа бла техникагъа, артда уа, ким биледи, энергетикни усталыгъына да сейирлерин къозгъар деп ышанабыз».

«РусГидро компанияны Къабарты-Малкъарда бёлюмюне быллай аламат онг бергени ючюн ыразылыгъыбызны билдиребиз, - деп чертгенди «Кюн шахарны» келечиси Малкъарланы Кристина. – Экскурсияны бек жаратханбыз. Сабийле республиканы энергетика  «жюреги»  къалай ишлегенин кеслери кёзлери бла кёрюп, билим да алып, кёллери кётюрюлгени игиди. Аланы айныуларына уллу себеплик этерик сынам болгъанды ол».

Ёсе келген тёлюде энергоресурслагъа аяулу кёзден къараргъа юйретиуге эмда энергетик усталыкъ бла шагъырейлендириуге РусГидро не заманда да уллу эс бурады эмда бу ишни мындан арысында да бардырып турургъа таукелди.