Бир жолгъа – тёрт «алтын»

Анапада Аскер тюйюшледен 17-чи битеуроссей оюнла бошалгъандыла. Анда 7 мингнге жууукъ спортчу кеслерини кючлерин кёргюзтгендиле. Аланы санында «Элбрус» клубну келечилери да болгъандыла.  Бу даражалы эришиуге

Жантудууланы Азамат бла Ёлмезланы Дагиб юйретген 15 спортчу къатышхандыла эм Къара тенгизни боюнундан 7 майдал бла къайтхандыла. 

Алай бла, кеси ауурлукъларында бла жыл санларында ахыр сермешлеге Уяналаны Омар (72 кг), Жангоразланы Амир (60 кг), Мендикеланы Имран (54 кг) эм Элбайланы Алийхан (45 кг) жетгендиле. «Алтын» ючюн ала кючлерин, усталыкъларын да аямай, хорлам болдургъандыла. 

Отарланы Алан (64 кг), Хапаланы Эмил  (51 кг) эм Эндрейланы Ислам (42 кг)  доммакъ майдалла алгъандыла. 

Дагъыда Уяналаны Омар  битеустильли каратеден Россейни спортдан устасына кандидатны мардасын толтургъанды.