Заманында сакъланнган игиди, артда бакъгъандан эсе

Кюз салкъынла, ызы бла уа къыш сууукъла грипп эмда ёпке-тамакъ аурууланы кезиулери болады. Адамгъа аланы къозгъагъан вирусла асламысында хауа бла кёчедиле. ОРВИ жукъса, ауруу аз-аздан кюч ала барады, кеси да бурун тунчукъгъан, терк арыгъан, къургъакъ жётел дегенча аллай ышанла бла башланады. Грипп а андан къайда башхады, аман затды. Роспотребнадзорну КъМР-де Управлениясында айтханларына кёре, анга жукъгъанны хали терк окъуна осал болады.

Бу ауруу адамны къолун, санын тюшюреди, титиретеди, терисин къыздырады (бир-бирледе 40 градусдан окъуна атлатыргъа болады). Грипп жетген адамны башы ауруп башлайды, шаугютлери бла сингирлери ачыйдыла, кюн жарыгъ а кёзлерин къаматып тебирейди.

Ауруу къан тамырлагъа да заран салады. Андан сора саусузну тиш эти къанап башларгъа да боллукъду. Гриппден къутулгъанны саны-чархы тюрлю-тюрлю инфекциялагъа бек тёзюмсюз болады, ол а бютюн уллу хатагъа келтирирге боллукъду.

Грипп бегирекда къагъанакъ сабийлеге, абаданлагъа, мардадан артыкъ ауурлукълары болгъанлагъа женгил жугъады. Жюреклеринде, нерва системаларында, ёпкелеринде, тамакъларында эрттеден бери ауруулары болгъанла эмда диабетден къыйналып тургъанла да киредиле ол къауумгъа.

Андан сакълагъан эм къыйматлы амал – иммунизацияды. Бютюнда башха тюрлю аурууладан къыйналгъанлагъа, саулукълары артыкъ иги болмагъанлагъа, къарыусузлагъа, башында сагъынылгъан къауумгъа киргенлеге да. Алай башха ОРВИ инфекцияладан а ол сакъламайды.

Адам аурумаз ючюн, кесине сакъ болургъа керекди: мардасы бла жукъларгъа, солуй, ишлей да билирге, таза хауада асламыракъ жюрюрге. Тышына чыкъгъанда, кюнню халине кёре кийинигиз, сууукъсуранмазгъа кюрешигиз. Аякъларыгъызны мылы этсегиз а, юйге келгенлей, исси суугъа сугъугъуз.

Ашха да уллу кёллю болургъа жарамайды. Анда А, С витаминлери, цинк, кальций болгъан продуктланы, ол санда, татлы чибижини, сютню, бишлакъны, тууар этни, бишген чабакъны, быхыны, жюзюмню, къатхан шапталланы асламыракъ ашаргъа кюрешигиз.

Кёп адам болгъан жерлеге барлыкъ эсегиз, медицина маска алыгъыз. Анда жётел этгенлени неда чючгюрюп тургъанланы кёрсегиз, аны бла бетигизни жабыгъыз. Ол болмаса уа, къол жаулукъ бла.

«Аякъ юсюнде» озгъан вирус аурууланы къайсылары да адамны саулугъуна бек уллу хата салыргъа боллукъдула. Ма ол себепден кесигизде ол башында сагъынылгъан белгилени эслегенигизлей, терк окъуна врачха барыгъыз.