Сабийле ючюн – бирге ишлерге

  Элбрус районну администрациясыны билим бериу управлениясы энчи къайгъырыу керекли болгъан эм къыйын жашау болумгъа тюшген сабийлеге къарагъан билим бериу учрежденияла бла бирге «Сабийле ючюн – бирге» деген акция бардырады. Аны чеклеринде Тырныауузда 1-чи номерли лицейни «Энчи балала» атлы арасында «Музей - хар кимге да» деген проект къуралгъанды, «Дунияны огъурлулукъ сакълар» деген чыгъармачылыкъ мастерской да ачылгъанды.
  Андан сора да, акцияны чеклеринде тюрлю-тюрлю тюбешиуле боладыла. Сёз ючюн, «Живое образование» проектге лицейни школгъа дери билим бериу бёлюмюню, Сабийлени бла жаш тёлюню чыгъармачылыкъларын айнытыуну Мокъаланы Магометни атын жюрютген арасыны, Бахсанны 5-чи номерли орта школуну устазлары къатышхандыла. Сабийле да, къауумлагъа юлешинип, суратланы тюрсюнлеге боягъандыла, бир бирлери бла ушакъ этгендиле. Бахсанчыла уа гитчелени жомакъны жигити «Минни Маус» бла ойнаргъа чакъыргъандыла, артда ол сабийлени саугъала бла да къууандыргъанды.
  - Бирлешип къуралгъан тюбешиуле устазлагъа, сабийлеге да чыгъармачылыкъ фахмуларын ачыкъларгъа, бир бирлери бла байламлыкъда ишлерге юйретедиле, - дегенди управленияны специалисти Моллаланы Зарета. 
  Ахырында уа Бахсандан къонакъла ресурс арагъа юч гинжи театр бергендиле эм аны устазларына, гитчелеге да жетишимле тежегендиле.

Суратлада: акциягъа къатышханла.