«Хорламны парадына къатышханым бла ёхтемленеме»

Жашууланы Баширни жашы Ислам Россейни МЧС-ини граждан къоруулауну генерал-лейтенант Дмитрий Михайлик атлы академиясыны курсантыды. Ол командалы-инженер бёлюмню сайлагъанды, 4-чю курсда окъуйду. Биз жаш бу усталыкъны нек сайлагъаныны, окъуудан сора къайда ишлерге умут этгенини юсюнден ушакъ бардыргъанбыз.

- Ислам, МЧС дегенде, адамланы жанларын, жашауларын сакълагъан эм ышаннгылы къутхарыучуну сыфаты кёз аллыбызгъа келеди. Сен да бу усталыкъны аны ючюн сайлагъан болурса?

- Кертисин айтханда, аскерчи, офицер боллукъма деп эсимде да жокъ эди. Келир заманда усталыкъны юсюнден а жаланда школну тамата классларында сагъыш этип башлайма. Аскерчи, Ата журтну къоруулаучусу эм сыйлы, хурметли усталыкъ болгъаны ючюн аны сайлайма. Академияда аскерчи къутхарыучуланы хазырлайдыла, ол жаны бла усталыкъгъа  жангыз бу вузда окъутадыла. 

МЧС-ни уа адамлагъа болушургъа, къыйын табийгъат неда техноген къыйынлыкъладан сакъларгъа онгум боллугъу ючюн айыргъанма. Ырхы тюшген, суу басхан, жер тепген жерге бек алгъа МЧС-де къуллукъ этгенле жетедиле.

- Сен окъугъан бёлюмню энчилиги уа недеди?

- Анда инженерлени хазырлайдыла. Академияны тауусхандан сора, лейтенант чын бериледи.

Факультетде бир ненча тюрлю усталыкъгъа юйретедиле – связистден башлап, робототехника жаны бла инженерге дери. Окъууну бошагъандан сора, взводха башчылыкъ этерге эркинбиз. Башхача айтханда, мен къуллукъ этип башласам, аскерчилеге, техникагъа таматалыкъ этерикме.

Алай къутхарыучуланы аскерчи бёлюмлерини хар бирини да борчлары энчидиле. Мен кесим къайда къуллукъ этеригим алыкъа белгисизди, Ата журтуму къайсы жеринде да къорууларгъа хазырма.

- Ислам, мен билгенден, сен быйыл Москвада Къызыл майданда Уллу Хорламны 80-жыллыгъына аталгъан Парадха къатышханса. Тизгиннге сюелип, нёгерлеринг бла бирге жамауатны аллында ётгенингде, къаллай сагъышла этгенсе?

- Мен Къызыл майданда парадха эки кере къатышханма: былтыр бла быйыл. Парадха тюшерге бек сюйгенме, биринчи кере алыкъа жаш болгъаным ючюн тизмеге кирмей къаллыгъыма къоркъуу болгъанды.

Аскер парад сыйлы, даражалы ишди. Анга сайлау да къатыды. Бек алгъа аскерчи быллай сыйлы даражагъа тийишли болургъа керекди. Низамлыгъына, окъууда жетишимлерине къаралады. Андан сора уа ёсюмюнг, саулугъунг да болургъа керекдиле.

Къызыл майданда нёгерлерим бла бирге тизгинде ётсем, Жашууланы тукъумда быллай сыйлы ишни мен биринчи толтурлугъуму сезгенме. Бу акъыл мени бютюнда жууаплы этгенди. МСЧ-ни вузларыны араларында быллай ишге жангыз бизни академия къатышады. Ол да бу ишни даражалыгъын кёргюзтеди. Аны ючюн парадха тюшер ючюн, бек къадалып кюрешгенме.

Баш главнокомандующийни буйрукълары, биринчи атламла, тюзюнлей эфир... Тизгин бла ётерни аллында бир кесек къайгъы да этгенме, алай биз бу жууаплы ишге жарым жылны хазырланнганыбыз кесими къолгъа жыяргъа болушханды.

Парадда ётген Уллу Ата журт урушда бизни шёндюгю жашауубуз ючюн жанларын, къанларын аямагъан къарт аппаларыбызгъа этилген уллу хурмет болгъанын ангылагъанма. Быллай онгум болгъаны бла бек ёхтемленеме, къууанама.

- Ислам, сени атанг Башир халкъ сюйген  жырчыды. Сен а жыр айтыргъа устамыса? 

- Атама сенича ариу ёнюм жокъду дегенимде, аны сен къайдан билесе деп, лакъырда этгенди. Гитчелигимде жырчы къаллай къыйын усталыкъ болгъанын, халкъда анга берилген сыйны иги ангыламагъанма.

Алай шёндю уа ол къаллай къыйын салгъанына, миллетни музыка культурасын айнытыуда даражасына тюшюннгенме. Атам манга хар заманда да юлгю болгъанды, аны жашыма деп, атын бийикде жюрютюрге  кюрешеме. Алыкъа аныча жетишимлерим жокъдула, алай жашау алдады, Аллах айтса.

- Кавказлы эр киши юйюрюню, элини, туугъан журтуну къоруулаучусуду, ол сыйлы борчду. Шёндюгю жаш тёлюге, жашауларын, келир кюнлерин сайлауну аллында болгъанлагъа не зат айтырыкъ эдинг?

- Россейни хар инсаны да Ата журтун сюерге, миллетине, халкъына сый берирге борчлуду. Мен миллетими, бизни энчи адет-тёрелерибизни, культурабызны, ана тилибизни бек сюеме.

Бизни факультетде 450 жууукъ курсант окъуйду, аланы арасында мен жангыз таулума. Аладан кёплери таулуланы юслеринден эшитген окъуна этмегендиле. Ол себепден  тенглерим бизни миллетге мени бетимден къарарыкъларын иги ангылайма, даражабызны бийикде жюрютеме. Аны ючюн жаш тёлюге да къайда болсала да кеслерин намыслы жюрютюрге, ахшылыкъла этерге, таулу миллетни, Кавказны ариу бетден кёргюзтюрге чакъырлыкъ эдим. 

Жашауда тюз жол сайларгъа, тукъумларына, халкъгъа, къыралыбызгъа жарагъан инсанла болуп ёсерлерин сюеме. Миллетге саулай а саулукъ, къолайлыкъ тилейме.