Устала хунерлерин баямларыкъдыла

«Жылны устасы-2025» Битеуроссей эришиуню ахыр къырал урумуна саулай да регионланы келечилери къатышырыкъдыла. Орта усталыкъ билим бериуде ишлеген устазланы араларында бардырылгъан конкурсну  ахыр кезиу уа бу жол Курск шахарда 29 сентябрьде башланырыкъды. СПО-ну эм ахшы устасына саналыр ючюн а, 89 адам ачыкъларыкъды кесини хунерин.

Вице-премьер Дмитрий  Чернышенко энди «Жылны устасы» эришиуге  беш жыл толгъанын эсгертгенди эмда анга быйыл окъуна колледжлени бла техникумланы устазларындан  кеслерине жууаплы усталыкъны сайлагъан 10 минг чакълы адам къатышханын да ахшы шартха санагъанды.

Конкурс «Профессионалла» федерал проектни чеклеринде бардырылады.   Анга къатышханла  бир бирден ахшы амаллагъа тюшюнедиле, башха регионладан келген устазла  бла шагъырейленип, жангы затлагъа да юйренедиле. Быйыл бу эришиуге  къатышыргъа сюйюп эм кёп заявкала бергенле уа Пермь край, Оренбург, Новосибирск, Белгород эмда  Самара  областьладыла.

РФ-ни жарыкъландырыу министри Сергей Кравцов чертгеннге кёре уа, Курскда бардырыллыкъ «Жылны устасы» эришиуню ахыр уруму къыралны эм ахшы, хунерли устазларын бирикдирликди.

Барыбыз да билгенликден, эришиуде алгъадан тохташдырылгъан низамгъа тийишлиликде, анда алгъа жылда ким хорласа да, эндиги жол конкурс аны туугъан жеринде бардырылыргъа керекди. 2024 жылда конкурсну къырал урумунда Курск областьда жашагъан Дмитрий Медведев алчы болгъан эди. Аны себепли эришиу да быйыл, белгилегенибизча, Курск шахарда бардырыллыкъды.

Бу жол Къабарты-Малкъардан а усталыкъ бла байламлы конкурсха аны регион кезиуюнде белгиленнген КъМР-ни гуманитар-техникалы колледжини устазы Арина Танашева  къатышырыкъды. Аны призёрларыны санында уа Элбрус регион колледжден уста Къазакъланы Фатима да болгъан эди.

«Жылны устасы» Битеуроссей эришиуню мураты, устазланы хунерлиликлерин ачыкълагъандан сора да, ишчи усталыкъланы педагогиканы да даражасын кётюрюу,  кадрланы  хазырлау бла байламлыды. Анга къатышыргъа уа битеулю дерследен окъутханланы, производстволу жаны бла тюшюндюргенлени, усталаны эркинликлери барды.

Къабарты-Малкъарда анга  къатышыргъа излегенлерин билдирип, эришиуню ал урумларында окъуна он окъуу махкемеден 36 адам заявка берген эди. Аны регион кезиуюнде уа устазлагъа эки бёлюмде керек болгъанды хунерлерин ачыкъларгъа. Аладан бири мастер-класс эди, бирсиси уа «Мен устама» деген ат бла болгъанды эмда анда устазны методикалы амалланы бла мадарланы къалай хайырланнганына, усталыкъ жаны бла хазырлыгъына эмда окъутуу-юйретиу сынамына къаралады. Мастер-классда уа окъуучула бла ачыкъ дерс бардырылады.

Алай бла «Жылны устасы» Битеуроссей усталыкъ эришиуню ахыр къырал уруму Курскда 29 сентябрьде башланырыкъды. Аны эсеплери уа къууанч халда 2 октябрьде - Профессионал билим бериуню кюнюнде - белгиленирикдиле. Бу жумуш кеси да телевизор  бла тюзюнлей эфирде да кёргюзтюллюкдю.